Tuesday 4 December 2012
"ಮೂಗು"
ನನ್ನ ಇದೇ ಲಲಿತಪ್ರಬಂಧದ ಹಳೆಯ ಪ್ರತಿಯನ್ನು ನನ್ನ ಮಿತ್ರರೋರ್ವರು ಅರ್ಧಂಬರ್ಧ ಓದಿ "ಇದೇನು ಸ್ವಾಮೀ ಮೂಗಿನ ವಿಷಯದಲ್ಲಿ ಪಿ.ಹೆಚ್.ಡಿ ಮಾಡಲು ಹೊರಟಿದ್ದೀರಾ?" ಎಂದು ನನ್ನನ್ನು ಪ್ರಶ್ಣಿಸಿದರು..ಅದಕ್ಕೆ ನಾನು ಮನದಲ್ಲೇ ನಕ್ಕು" ಹೌದು ಸ್ವಾಮೀ ಎಲ್ಲರೂ ಪ್ರಕೃತಿ ಪುರಾತನವಸ್ತು,ಭಾಷೆ ಇತ್ಯಾದಿಗಳ ಮೇಲೆ ಸಂಶೋಧನೆ ಮಾಡುತ್ತಾ ಡಾಕ್ಟರೇಟ್ ಪಡೆಯುತ್ತಿರುವಾಗ ನಮ್ಮೆಲ್ಲಾ ಜೀವಿಗಳ ಅವಿಭಾಜ್ಯ ಅಂಗವಾದ ಮೂಗಿನ ಬಗ್ಗೆ ಪಿ.ಹೆಚ್.ಡಿ ಮಾಡಬಾರದೇಕೆ?" ಎಂದು ತಿರುಗಿ ಪ್ರಶ್ಣಿಸಿದೆ."ಓಹೋ ಹಾಗೇನು?" ಎಂದು ಬೇರೆ ವಿಷಯದತ್ತ ಗಮನ ಹರಿಸಿದರು.ಅವರು ಇಂತಧುದರ ಬಗ್ಗೆ ಹೆಚ್ಚು ತಿಳಿದವರಲ್ಲ.
ಇನ್ನು ನೇರವಾಗಿ ವಿಷಯಕ್ಕೆ ಬರೋಣ.ಕೆಲವು ಅವಿವೇಕಿಗಳು ಇಬ್ಬರು ಜಗಳಮಾಡುತ್ತಿರುವಾಗ ಮಧ್ಯೆ ಪ್ರವೇಶಿಸಿ ಜಗಳ ಮಾಡುತ್ತಿರುವವರ ಕೈಯಿಂದ(ಬಾಯಿಯಿಂದ?)"ನೀನು ನಮ್ಮ ವಿಷಯದಲ್ಲಿ ಮೂಗು ತೂರಿಸಬೇಡ ಎಂದು ಬೈಸಿಕೊಳ್ಳುತ್ತಾರೆ.ಮೂರನೆಯವನು ನಿತ್ರಾಣಿಯಾಗಿದ್ದು ಉಳಿದಿಬ್ಬರು ಮಹಾಪ್ರಾಣಿಗಳಾಗಿದ್ದಲ್ಲಿ ಅವರಿಬ್ಬರ ಕೈಯಿಂದಲೂ ಏತು ತಿಂದು ನಿಷ್ಪ್ರಾಣಿಗಳಾಗುತ್ತಾರೆ.(ಇದಕ್ಕೆ ಸ್ಫೂರ್ತಿ:ವ್ರೆಸ್ಲಿಂಗ್ ನಲ್ಲಿ ಜಗಜಟ್ಟಿಗಳಿಂದ ರೆಫ್ರೀ ಏಟು ತಿಂದ ದೃಶ್ಯ!)
ನಮ್ಮ ಮಂಗಳೂರು ಕಾಸರಗೋಡಿನ ಕಡೆ ಸ್ವಲ್ಪ ಹೆಚ್ಚು ಕೋಪ ಇರುವವರನ್ನು "ಅವನಿಗೆ ಮೂಗಿನ ಮೇಲೆ ಮಸಿ ಉಂಟು ಎನ್ನುವಾಗ ಕೋಪ" ಎಂದು ಇತರರು ಗೇಲಿ ಮಾಡುವುದುಂಟು.ನೀವೆಂದಾದರೂ ಉಭಯ ಕುಶಲೋಪರಿಯ ನಡುವೆ (ಈ ಬರಗಾಲದಲ್ಲಿ) ಕೆರೆಯಲ್ಲಾಗಲೀ ಹೊಳೆಯಲ್ಲಾಗಲೀ "ನೀರು ಎಷ್ಟಿದೆ"? ಎಂದು ಮಾತ್ರ ಕೇಳಬೇಡಿ..ಅವರು "ಕಪ್ಪೆಗೆ ಮೂಗಿನ ವರೆಗೆ ಮಾತ್ರ" ಎಂದಾರು..!!
ಸೌದೆ ತುಂಡರಿಸುವಾಗ ಆ ಕತ್ತಿ ಹರಿತವಾಗಿಲ್ಲದಿದ್ದಲ್ಲಿ "ಸತ್ತ ಹೆಣದ ಮೂಗು ಕೊಯ್ಯಲೂ ಸಾಧ್ಯವಿಲ್ಲ ಈ ಕತ್ತಿಯಿಂದ" ಎಂದು ಗೊಣಗುವವರಿದ್ದಾರೆ.ಮಕ್ಕಳು ಸ್ವಲ್ಪ ಜಾಸ್ತಿ ಊಟ ಮಾಡಿದ್ದು ತಾಯಿಯ ಬಳಿ ಪುನಃ ಏನಾದರೂ ತಿಂಡಿ ಕೇಳ ಹೋದರೆ "ಈಗ ತಿಂದದ್ದೇ ಮೂಗಿನವರೆಗೆ ಆಗಿದೆ,ಇನ್ನೂ ಎಲ್ಲಿಗೆ ತುಂಬಿಸುವುದು?" ಎಂದು ತಂದೆ ಗದರುವುದುಂಟು..
ಕೆಲವರು ಮಾತನಾಡುತ್ತಿದ್ದರಂತೂ ಮೂಗಿನಲ್ಲಿ ಮಾತನಾಡುತ್ತಿದ್ದಾರೋ ಬಾಯಲ್ಲಿ ಮಾತನಾಡುತ್ತಿದ್ದಾರೋ ಎಂಬುದೇ ತಿಳಿಯುವುದಿಲ್ಲ.ಕೆಲವು ರಾಜಕಾರಣಿಗಳಂತೂ ತಮ್ಮ ಮೂಗಿನ ನೇರಕ್ಕೇ ಮಾತಾಡುವುದು.ಆಮೇಲೆ ವೋಟು ಸಿಕ್ಕಿ ತಮ್ಮ ಸ್ಥಾನ ಭದ್ರವಾದ ನಂತರ ಜನರು ಏನಾದರೂ ಸಮಸ್ಯಾ ಪರಿಹಾರಕ್ಕೆ ಹೋದರೆ ಅವರನ್ನು ಕಂಡ ಕೂಡಲೇ "ಮೂಗು ಮುರಿಯುತ್ತಾರೆ" ಅಥವಾ "ಮೂಗಳೆ"ಯುತ್ತಾರೆ.!
ಇನ್ನು ಇತಿಹಾಸದತ್ತ ನೋಡಿದರೆ ಕಾಳಿದಾಸನೂ ಮೂಗನ್ನು ಸಂಪಿಗೆಗೆ ಹೋಲಿಸಿದ್ದಾನೆ. ಸಂಪಿಗೆ ಎಲ್ಲಿದ್ದರೂ ನಾವು ಮೂಗರಳಿಸುವುದಿಲ್ಲವೇ..? ಶೂರ್ಪನಖಿಯ ಮೂಗಿನಿಂದಾಗಿ "ನಾಸಿಕ್" ಎಂದು ಊರಿಗೆ ಹೆಸರಾಯಿತು..!!
ಮೊನ್ನೆ ಪೇಪರ್ ನಲ್ಲಿ ವಿದೇಶೀ ವಾರ್ತೆಯ ವಿಭಾಗದಲ್ಲಿ ಓದಿದ್ದೆ.ಒಬ್ಬಾಕೆಯನ್ನು ಕಳ್ಲರು ಅವಳ ಮನೆಯಲ್ಲಿಯೇ ಕಟ್ತಿ ಹಾಕಿ ಹಣವನ್ನೆಲ್ಲಾ ಕದ್ದುಕೊಂಡು ಹೋದರಂತೆ..ಆದರೆ ಆ ಮಹಿಳಾಮಣಿ ತನ್ನ ಮೂಗಿನಿಂದ ಫೋನ್ ಮಾಡಿ ಪೋಲೀಸರನ್ನು ಕರೆಸಿ ಅವರನ್ನು ಜೈಲಿಗೆ ಕಳಿಸಿದಳಂತೆ.ಮೂಗಿನಿಂದ ಅವಳು ಹೇಗೆ ಫೋನ್ ಮಾಡಿದಳೋ,ಪೋಲೀಸರು ಬರುವ ವರೆಗೂ ಆ ಕಳ್ಲರು ಅಲ್ಲೇ ಇದ್ದರೋ ಕಾಣೆವು.ಬಹುಷಃ ಅವಳ ಮೂಗು ತುಂಬಾ ಉದ್ದ ಇದ್ದಿರಬಹುದೆ?
ಅಂದ ಹಾಗೆ ಉದ್ದ ಮೂಗು ಎಂದಕೂಡಲೇ ನೆನಪಾಯಿತು ನೋಡಿ, ಮೊನ್ನೆ ಒಬ್ಬಾಕೆ (ಉದ್ದ ಮೂಗು ಇರುವವಳು) ನನ್ನಲ್ಲಿ ಮಾತನಾಡುತ್ತಿದ್ದಳು.ನನ್ನ ದೃಷ್ಟಿ ಆಕೆಯ ಮೂಗಿನ ಕಡೆ ಹೋಗಿ ಆಮೇಲೆ ಯೋಚನೆ ಎಲ್ಲೆಲ್ಲೋ ಹರಿದು"ನಿನ್ನ ಈ ಮೋಗಿನಿಂದಾಗಿ ತುಟಿಗಳು ಕೆಲಸ ಮಾಡಲು ಅಡ್ಡಿಯಾಗಿರಬಹುದಲ್ಲವೇ?" ಎಂದೆ.ಸಧ್ಯ..! ಆಕೆ ನನ್ನ ಸಂಬಂಧಿಕಳೂ,ಸ್ನೇಹಿತೆಯೂ ಎರಡೂ ಆಗಿದ್ದರಿಂದ ನನ್ನ ಮೂಗಿನ ಪಕ್ಕದ ವಿಶಾಲ ಹುಲ್ಲುಗಾವಲಿಗೆ ಸಿಡಿಲು ಬಡಿಯಲಿಲ್ಲ..:))
ಮೂಗಿನ ಬಗ್ಗೆ ನನ್ನ ಮಿತ್ರ ಹೇಳಿದ ಒಂದು ಜೋಕ್ ನೆನಪಾಗುತ್ತಿದೆ..ಇಲ್ಲಿ ಮೂಗಿನ ಪಾತ್ರ ಕನಿಷ್ಠದ್ದಾದರೂ ಮಹತ್ವದ್ದು..
ಒಮ್ಮೆ ಅಮೆರಿಕ,ಜಪಾನ್ ದೇಶದವರು ನಮ್ಮ ಭಾರತೀಯನೆದುರಿಗೆ ಬಡಾಯಿ ಕೊಚ್ಚುತ್ತಿದ್ದರು..
ಅಮೆರಿಕದವ:"ನಮ್ಮಲ್ಲಿ ವಿಮಾನಗಳೆಲ್ಲಾ ನೆಲದಲ್ಲೇ ವೇಗವಾಗಿ ಹೋಗುತ್ತವೆ"
ಉಳಿದಿಬ್ಬರು: ಹೌದೇ...?
ಅಮೆರಿಕದವ:"ಅಲ್ಲ ಸ್ವಲ್ಪ ಮೇಲೆ.. ಆಕಾಶದಲ್ಲಿ"
ಜಪಾನ್ ನವ:"ನಮ್ಮಲ್ಲಿ ರೈಲುಗಳೆಲ್ಲಾ ನೀರಿನಡಿಯಲ್ಲೂ ಓಡುತ್ತವೆ"
ಉಳಿದಿಬ್ಬರು: ಹೌದೇ...?
ಜಪಾನ್ ನವ:"ಅಲ್ಲ..ಸ್ವಲ್ಪ ಮೇಲೆ ನೆಲದಲ್ಲಿ"
ಆದರೆ ಭಾರತದಲ್ಲಾದರೋ ಹೇಳಿಕೊಳ್ಲುವುದೇನೂ ಇಲ್ಲ..ಆದರೆ ಇವರೆದುರು ಗೆಲ್ಲಬೇಕು..ಹೇಗೆಂದು ಚಿಂತಿಸಿ ಕೊನೆಗೆ ಹೇಳಿದ" ನಮ್ಮಲ್ಲಿ ಎಲ್ಲರೂ ಮೂಗಿನಲ್ಲೇ ಊಟ ಮಾಡುತ್ತಾರೆ"
ಉಳಿದಿಬ್ಬರು: ಹೌದೇ...?
ಭಾರತೀಯ: ಅಲ್ಲ.. ಸ್ವಲ್ಪ ಕೆಳಗೆ ಬಾಯಲ್ಲಿ..!!!
ಎಂದು ಅವರ ಢಾಂಭಿಕ ಗರ್ವವನ್ನು ಇಳಿಸಿದನಂತೆ..!
ಇನ್ನಾದರೂ ನೀವು ಮೂಗಿನ ಬಗ್ಗೆ ವಿಶೇಷ ಗಮನ ಹರಿಸದಿದ್ದಲ್ಲಿ ಕೇಳಿ..
ಅಡಿಗೆಯ ರುಚಿ ಮೊದಲು ನಿಮಗೆ ನಾಲಿಗೆಗಿಂತ ಮೊದಲು ತಿಳಿಯುವುದು ಮೂಗಿಗೇ ತಾನೆ?ಚಿಕ್ಕ ಮಕ್ಕಳು ಅಸಾಧಾರಣ ಕೆಲಸ ಮಾಡಿದರೆ ನೀವು"ಮೂಗಿನ ಮೇಲೆ ಬೆರಳಿಡುವುದಿಲ್ಲವೇನು?"ಅದೇ ಮಕ್ಕಳು ಅಧಿಕಪ್ರಸಂಗ ತೋರಿದರೆ "ನಿನಗೆ ಮೂಗುದಾರ ಹಾಕಬೇಕು" ಎಂದು ಗದರಿಸುವುದಿಲ್ಲವೇನು?
ರಾತ್ರೆ ಎಲ್ಲಾದರೂ ನಿವು "ಮೂಗು ಕಟ್ತಿದೆ(ಅಥವಾ ಕೆಟ್ಟಿದೆ) ಎಂದು ಬಾಯಗಲಿಸಿ ಉಸಿರಾಡಿದಿರೋ ಹುಷಾರ್!
ನಿಮ್ಮ ಪಕ್ಕದವರು ನಿಮ್ಮನ್ನು "ಗೊರಕೆ ವೀರ" ಎಂದೌ ಜರಿದಾರು! ನಿಮ್ಮ ದೃಷ್ಟಿ ಮಂದವಾದಾಗ "ಸುಲೋಚನ" ನಿಮ್ಮ ಮೂಗಿನ ಮೇಲೆಯೇ ಕುಳಿತುಕೊಳ್ಲುತ್ತಾಳೆ!
ಇಷ್ಟೊಂದು ಪರಿಸರಮಾಲಿನ್ಯ,ಧೂಳು,ಹೊಗೆ ಇದ್ದಾಗಲೂ ನೀವು ಆರೋಗ್ಯವಂತರಾಗಿರಲು ಕಾರಣ ಮೂಗು ಗಾಳಿಯನ್ನು ಸಾಧ್ಯವಾದಷ್ಟು ಶುದ್ಧ್ಹೀಕರಿಸುವುದರಿಂದ..
"ಹಲ್ಲೆದುರು"(ಎದುರುಹಲ್ಲು) ಇಲ್ಲದವರಿಗೆ ಮೂಗೇ ಬಂಪರ್ ಎಂದು ಮಿತ್ರನೊಬ್ಬ ನಗೆಯಾಡುವುದಿದೆ.ಕೆಲವರು ತಿಲಕವನ್ನಿಡುವುದಂತೂ ಮೂಗಿನ ಬುಡದಲ್ಲಿ.ಕೆಲವರಿಗೆ ಹದ್ದಿನಂತೆ,ಗಿನಿಯಂತೆ,ವಾನರನಂತೆ ಮೂಗಿನ ಆಕಾರವಿರುತ್ತದೆ,ಅದರಿಂದಾಗಿಯೇ ಸಾಕಷ್ಟು ಉಪನಾಮ(ಮಾನ) ಹುಟ್ಟುಕೊಂಡಿರುತ್ತವೆ.ಮೂಗನ್ನು ಕುರಿತು ಒಂದು ಒಗಟಂತೂ ಪ್ರಸಿದ್ಧ."ಪುಟ್ಟ ಮನೆಗೆ ಚಿನ್ನದ ಬೀಗ"
ಕೆಲವು ಮೂಗುದಾರ ಹಾಕದ ಕೋಣಗಳಂತೂ ಪಕ್ಕದ ಮನೆಯವರಿಗೆ "ನಿತ್ಯ ಭಯೋತ್ಪಾದಕ"ಅದರ ಹಗ್ಗ ಬಿಚ್ಚಿದಾಕ್ಷಣ ಶತ್ರುಪಾಳೆಯವನ್ನು ಧ್ವಂಸ ಮಾಡಿಯೇ ಬರುವುದು..!
ಧೂಮಪಾನಿಗಳಿಗಂತೂ ಬಾಯಲ್ಲಿ"ಧೂಮಕೇತು"ವನ್ನಿರಿಸಿ ಚೆನ್ನಾಗಿ ಎಳೆದು ಮೂಗಿನ ಮೂಲಕ ಹೊಗೆ ಬಿಟ್ಟರೇನೇ ಸಮಾಧಾನ.ಆ ಮೂಲಕ ಇತರ ಜನರಿಗೂ ಹೊಗೆ ಕುಡಿಸಿ ಜನಸಂಖ್ಯಾ ಸ್ಫೋಟವನ್ನು ತಪ್ಪಿಸುವಲ್ಲಿ ಪ್ರಮುಖ ಪಾತ್ರವಹಿಸುತ್ತಾರೆ.ಇನ್ನು ಕೆಲವರು ನಶ್ಯ ಎಳೆದು "ಆ.........ಕ್ಷೀ" ಎಂದು ಸೀನು ಬರಿಸಿ ತಮ್ಮ ಯೋಚನೆಗೆ ಅದೊಂದು ಜ್ಞಾನಚೂರ್ಣವೆಂದು ಬೀಗುತ್ತಾರೆ.ಇನ್ನು ಪೇಟೆಗೆ ಹೋದರಂತೂ( ನೀವು ಮೂಗು ಇದೆಯೇ ಇಲ್ಲವೇ ಎಂದು ಪರೀಕ್ಷಿಸಿಕೊಳ್ಳುತ್ತಿದ್ದೀರೇನೋ ಎಂದು ಇತರರು ಅಂದುಕೊಳ್ಲಬೇಕು) ಕೈಗೂ ಮೂಗಿಗೂ ಅವಿನಾಭಾವ ಸಂಬಂಧ ಉಂಟಾಗುತ್ತದೆ.
ಕೊನೆಯದಾಗಿ ಒಂದು ಸಲಹೆ: ಮಗು ಕಚ್ಚಿದಾಗ ಮೂಗನ್ನು ಒತ್ತಿ ಹಿಡಿಯಿರಿ(ನಿಮ್ಮದಲ್ಲ,ಮಗುವಿನದ್ದು!).ಅದು ಉಸಿರಾಡುವ ನೆಪಕ್ಕಾದರೂ ಬಾಯಿಯ ಹಿಡಿತ ಸಡಿಲಿಸುತ್ತದೆ.
ಇಷ್ಟು ಉದ್ದದ ಮೂಗನ್ನು...ಅಲ್ಲಲ್ಲ..ಮೂಗಿನ ಕುರಿತ ಲೇಖನವನ್ನು ನಾನಂತೂ ನನ್ನ ಮೂಗಿನ ನೇರಕ್ಕೇ ಬರೆದಿದ್ದು ಇದರಿಂದ ನೀವು ಮೂಗು ಮುರಿದರೂ ಮೂಗಿನ ಮೇಲೆ ಬೆರೆಳಿಟ್ತರೂ ಸಮಾನವಾಗಿ ಸ್ವೀಕರಿಸುತ್ತೇನೆ..ಏಕೆಂದರೆ ಅದರಿಂದ ನನ್ನ ಮೂಗಿಗೇನೂ ಹಾನಿಯಿಲ್ಲವಲ್ಲ..!!:))
Friday 25 May 2012
ಚುಟುಕ "೮೧-೧೦೦"
೮೧."ಶ್ರಮ-ವಿಕ್ರಮ"
ಹಿಡಿದ ಗುರಿ ಸಾಧಿಸು ಉತ್ಸಾಹ ಸಾಯದೇ..
ನಡೆ ಹಿಂದೆ ನೋಡದೇ ಯಶಸ್ಸಿದ್ಧ ಕಾಯದೇ..
ಕೂಡದು ಹಾದಿ ಕ್ರಮಿಸಲು ಕಾಲು ನೋಯದೇ..
ಪಡೆದ ಜಯದಿ ಕಳೆದ ನೋವು ಮಾಯದೇ..?
೮೨."ಗುರು"
ನಡೆವ ಹಾದಿಯೊಳು ಮುಳ್ಳು ತರಚಿದರೂ..
ಗುಡುಗಿ ಮಳೆಗಾಗಿ ಪರರ ನೆಚ್ಚದಿರು..
ಅಡಿಗಡಿಗೆ ಹಿಡಿವ ಹಸ್ತ ಚಾಚಿಗುರು..
ಬಿಡದೆ ಛಲಜಲವ ಕುಡಿದು ಚಿಗುರು..
೮೩."ಪ್ರಾರ್ಥನೆ"
ಹುಟ್ಟುವುದು ಸಾಯುವುದು ಜನರ ಪಾಡು
ದಟ್ಟವಾಯಿತೆ ಪಾರಾಗಲು ಕಷ್ಟ ಕಾಡು..?
ನಷ್ಟಮಾಡದೆ ಭಕ್ತಿ,ಛಲಕೆ ಕಾಪಾಡು
ಕೊಟ್ಟು ಒಳ್ಳೆಯತನವ ಮನದಿ ಕಾಡು
೮೪."ಸ್ವದೇಶಿ"
ಕೋಕಕೋಲ ಪೆಪ್ಸಿ ಸ್ಟ್ರಾಬೆರಿ ಸೇಬು..
ಕೊಕ್ಕೋ ಎಲ್ಲಾ ತಪ್ಸಿ ದುಬಾರಿ ಜೇಬು..
ಬೇಕು ಸ್ವಕೃಷಿಯ ಪೇರಳೆ,ನಿಂಬೂ..
ಸಾಕು ಎಳನೀರು ನೇರಳೆ ಜಂಬೂ..
೮೫."ನಂದನ"
ಬರುತಿರುವ ಏಳಿಗೆಯ ನಂದನ..
ತರುತಿರುವ ಬೆಳಕಿನ ಇಂಧನ
ಸರಿಕರೆವ ಹೇಳಿ ಅಭಿವಂದನ
ನುರಿತನಿವ ಬಾಳುವೆಯ ಬಂಧನ..
೮೬."ಹೊಸತು"
ಭಾನಿಲ್ಲದೆ ಕತ್ತಲೆಂದು ಕೊರಗದಿರು ಇಂದು..
ಬಾನಲ್ಲಿಯೆ ಸುತ್ತಲಿಗೂ ದಾರಿತೋರುವ "ಇಂದು"
ಬೆನ್ನಲ್ಲಿಯೆ ಮುಕ್ತವಿದು ಹಳೆಕಾಲವು ಸಂದು..
ಬಾ ನಾಳೆಗೆ ಶಕ್ತವಿದು ಕಳೆದಾಯಿತು ಸಂಧು..
೮೭"ಯುಗಾದಿ"
ಬಾ ನಿಲ್ಲದೆ ತುತ್ತುದಿಗೆ ಗುರಿಕಾಣುವ ಗಾದಿ..
ಬಾನೆಲ್ಲೆಗೆ ಹತ್ತಲಿದೇ ಸಿರಿಯಾಗಿ ಯುಗಾದಿ..
ಭಿನ್ನವಾದರೂ ತೊಲಗದಿರು ಸರಿಸಣ್ ಹಾದಿ..
ಬನವಾಸಿ ಹಾರೈಸಿದೆ ಕವಿತೆಯೊಂದ ಹಾಡಿ..
೮೮."ನಿರುಪಯೋಗಿ"
ಮಾನ ಮುಚ್ಚುವುದೆ ನಾಯಿ ಬಾಲಕೆ..?
ನೊಣ ಕಚ್ಚದೇ ತನ್ನ ಹಂಬಲಕೆ..
ಗುಣ ಹೆಚ್ಚಿದರೆ ಶ್ರೇಷ್ಠ ಬಳಕೆ..
ವಿನಾ ನೆಚ್ಚದಿರು ಭ್ರಷ್ಟ ಬಲಕೆ..
೮೯."ಫೇಸ್ ಬುಕ್"
ದಿನವೆಲ್ಲ ದುಡಿದುಂ ಶ್ರಮಕೆ ಮನ ಸಣ್ಣಮುಖೀ..
ಜನರೆಲ್ಲ ಕೂಡಿಡುಂ ವಿಶ್ರಮಕೆ ತಾಣ ಸಂಮುಖೀ..
ಬಣದಲ್ಲಿ ನೋಡಿಯುಂ ರಾಮನಿವ ಸಹ ಸನ್ಮುಖೀ..
ಗುಣದಲ್ಲಿ ಬೇಡಿಯುಂ ವಿರಾಮವೀವ ಹಸನ್ಮುಖೀ..
೯೦."ಬೇಡಿಕೆ"
ದೇವ ನನ್ನ ತನುಮನ ನಿನಗೆ ಶರಣ..
ನೋವ ಮುನ್ನ ಕರಗಿಸಿ ತೋರು ದಿಶಾರುಣ..
ಜೀವ ನಿನ್ನ ಮಾಳ್ಪುದು ನಿತ್ಯ ಅನುಸರಣ..
ಭಾವ ಭಕ್ತಿಗೆ ಸ್ಫುರಿಸು ಶಾಂತಿ ಪ್ರಸರಣ..
೯೧."ಸೀತಾರಮಣ"
ಕಶ್ಮಲವ ಕಳೆದೇವ ಸೀತಾರಮಣ..
ವಿಸ್ಮಯವ್ ಇಳೆಗೆ ನಿನ್ನಾಮದ ಭ್ರಮಣ..
ಭಸ್ಮಿಸಿದೆ ಕತ್ತರಿಸಿ ಕಳೆದ್ ರಾವಣ..
ಸುಸ್ಮಿತನೆತ್ತು ಅರಿಸಿ ಕೊಳೆ ದ್ರಾವಣ..
೯೨."ರಾಮ"
ಹಾಡಿ ಮಿಡಿಯಲು ನಾಡಿ ರಾಮನ..
ನೋಡಿ ಹಿಡಿಯಲು ಜಾಡು ಗಮನ..
ಕೂಡಿ ನಡೆಯುವೆ ಕಾಡಿ ಯಮನ..
ಬೇಡಿ ಪಡೆಯುವೆ ಮುಡಿ ಸುಮನ..
೯೩."ನೀತಿ"
ಮೆಟ್ಟಿಲದು ಸಾಧನೆಗೆ ಹಿರಿ,ದೇವರಿಗೆ ನಮನ..
ಕೆಟ್ಟ ಪರ ವೇದನೆಗೆ ಕಾರಣದ ಹಾದಿ ವಮನ..
ದುಷ್ಟಜನ ವ್ಯವಹಾರದ ಮಾರಣ ನೀತಿ ದಮನ..
ಇಷ್ಟವಾಗಿ ಸಜ್ಜನರಿಗೆ ತೋರಣ ಶಾಂತಿ ಶಮನ..
೯೪."ರೀತಿ"
ಗುರಿ ತೋರಲಿ ಸದಾ ಸೇವಿತ ಗುರುಚರಣ
ಗಿರಿಯೆಡೆಗೆ ಮಾಡಿದಂತೆ ಸಾಹಸ ಚಾರಣ
ಗರಿಯಂತೆ ಸಜ್ಜನ ಸಾಹಚರ್ಯ ವಿಚಾರಣ
ಗಾರೆಯಾಗಲಿ ವಿಶ್ವಾಸದ ಸಹಜ ಚೂರಣ
೯೫."ದ್ರೋಹ"
ಕಟ್ಟಿಕೊಳ್ಳಲು ನಾ ಆತ್ಮವಿಶ್ವಾಸದ ಕಟ್ಟೆ..
ಬಿಟ್ಟುಕೊಂಡು ನಿನ್ನ ಬಳಿಗೆ ಕರಗಿ ಕೆಟ್ಟೆ..
ಇಷ್ಟವಾಗಿ ನಿನ್ನ ಬಾಳಿಗೆ ಹೆಗಲು ಕೊಟ್ಟೆ.
ಕಷ್ಟ ಕಾಲದಿ ಬಿಟ್ಟು ಸುಡುಕೊಳ್ಳಿಯಾಕಿಟ್ಟೆ.?
೯೬."ಮನಸ್ಸು"
ಜಂಜಡದ ಎಡೆಯೊಳಗೆ ಬರಬಾರದು ಸಿಟ್ಟು
ಮಂಜಂತೆ ತಿಳಿ ಬಿಸಿಲಿಗೆ ಮನ ಕರಗಿಸಿಟ್ಟು..
ದುರ್ಜಡತ್ವವು ಕಳಚಿಕೊಳ್ಳಲಿ ಬೆರಗು ಸುಟ್ಟು.
ನಿಜ ನಡತೆಯ ನೆಮ್ಮದಿ ಬಾ ಶುದ್ಧ ಮನಸುಟ್ಟು..(ಮನಸು+ಉಟ್ಟು)
೯೭."ಒಳಿತು"
ದೇವದಾರಿಗೆ ಮೇಲೇರಲು ನೂರಾರು ಬಿಳಲು
ಅವನ ಕೃಪೆ ಒಂದಿರಲು ಆಗದು ಬೀಳಲು..
ಜೀವನದೊಳು ಮರೆತಾಗ ನೋವಿಂದ ಬಳಲು
ಭಾವಕೆ ನಂಬಿಕೆ ಬೆರೆತು ಸವಿಯೇ ಬಾಳಲು..
೯೮."ಮಾತು"
ನೀತಿ ತಪ್ಪಿದರೆ ಆಗುವುದು ತಕರಾರು
ಮಾತಿಗೊಪ್ಪಿದರೆ ನಡೆಯಬೇಕು ಕರಾರು
ನೈತಿಕ ಅಡಿಪಾಯವಿರೆ ಬಿದ್ದವರಾರು..?
ಧೃತಿಯಿಂದ ಮತಿಯೋಡೆ ಗೆಲ್ಲು ಸಾವಿರಾರು..
೯೯."ಕೃಷ್ಣ"
ಕುಸಿದು ಕುಳಿತವಳೆ ತಾಯಿ ಭವಾನಿ..
ಹುಸಿ ಮಾತು ಕೊಟ್ಟೆಯಾ ಅರ್ಜುನ ಭಾವಾ ನೀ..
ಅಸುರ ಗುಣ ಸಂಹರಿಸೆ ಸಂಭವಾಮಿ..
ವಸುಧೆಯೊಳ್ ಅವತರಿಸಲ್ ಭಾವಯಾಮಿ..
೧೦೦."ಅನ್ವೇಷಣೆ.."
ಮನೆಯಲ್ಲಿ ಹುಡುಕಿದೆ..ಗುಡಿಯಲ್ಲಿ ಹುಡುಕಿದೆ..
ಮನದೊಳು ಹುಡುಗಿಯ ರೂಪವದು ಸುಡುತಿದೆ..
ಗೂಗಲೊಳು ತಡಕಿ ಜಗವೆಲ್ಲ ಗುಡಿಸಿದರೂ..
ಜಗಲಿಯದು ಮನೆಯೇ...ಅಮ್ಮನಿಗೆ ಖಾಲಿ..ಖಾಲಿ...:((
Wednesday 23 May 2012
"ಒಂದು ಲೈಸೆನ್ಸಿನ ಕಥೆ"
ಈ ಕಥೆಯನ್ನು ಓದಿ ಇಷ್ಟೆಯಾ? ಎಂದು ನಕ್ಕುಬಿಡಬೇಡಿ..ಇದು ನನ್ನ ಒಂದು ವರ್ಷದ ಜೀವನದ ಕಥೆ..ಇದರಲ್ಲಿ ನಾನು ಕಲಿತ ಅನೇಕ ಸಂಗತಿಗಳಿವೆ..
ವಿಷಯ ಏನೆಂದರೆ ಕಳೆದ ವರ್ಷ ಎಪ್ರಿಲ್ ೨೪ ರಂದು ನನ್ನ ಚಿಕ್ಕಮ್ಮನ ಮಗಳು ತಂಗಿಯ ಮದುವೆ ಮಡಿಕೇರಿಯಿಂದ ಸುಮಾರು ೧೩(೧೩-೧೬..?)ಕಿ ಮೀ ದೂರವಿರುವ ಚಟ್ಟಳ್ಳಿಯ ಮಹೇಂದ್ರ ಎಂಬವರೊಂದಿಗೆ ಜೋಡುಕಲ್ಲಿನ ದುರ್ಗಾಲಯ ಮಂದಿರದಲ್ಲಿ ನಡೆಯಿತು.ಮರುದಿನ ಸಟ್ಟುಮುಡಿ(ವಧೂಗೃಹಪ್ರವೇಶ) ಚಟ್ಟಳ್ಳಿಯಲ್ಲಿ ವರನ ಮನೆಯಲ್ಲಿ ಜರುಗಿತು.ಸಟ್ಟುಮುಡಿಗೆ ಬಸ್ಸುಗಳ ಯಾವುದೋ ಏಜೆಂಟ್ ಮೂಲಕ ಮಾತನಾಡಿ "ಸಾಲ್ಯಾನ್" ಬಸ್ಸನ್ನು ಗೊತ್ತುಮಾಡಿದ್ದರು.೨೫ರ ಬೆಳಗ್ಗೆ ೩.೩೦ ಕ್ಕೆ ಸರಿಯಾಗಿ ವರನ ಮನೆಗೆ ದಿಬ್ಬಣ ಹೊರಡುವುದೆಂದು ತೀರ್ಮಾನಿಸಿದ್ದರು.ಬಸ್ಸು ಹೊರಡಲುದಿಬ್ಬಣಿಗರು ಹತ್ತಿ,ಸರಂಜಾಮು(ಲಗೇಜ್) ತುಂಬಿಸುವಾಗ ಡ್ರೈವರ್ ಎಲ್ಲಿಗೆ ಹೋಗಬೇಕು ಎಂದು ಪ್ರಶ್ನೆ ಮಾಡಿದ..ಮಡಿಕೇರಿಯಿಂದ ಸುಮಾರು ೧೩(೧೩-೧೬..?)ಕಿ ಮೀ ದೂರವಿರುವ ಚಟ್ಟಳ್ಳಿಗೆ ಎಂದೆವು."ಓ ಮಡಿಕೇರಿಡ್ದ್ ಲಾ ಅಂಚಿ ಪೋವೊಡಾ?"(ಮಡಿಕೇರಿಯಿಂದಲೂ ಆಚೆ ಹೋಗಬೇಕೆ?) ಎಂದ..ಅವನಿಗೆ ಆ ವಿಷಯ ಗೊತ್ತಿರಲಿಲ್ಲವಂತೆ.
ಅಂತೂ ಬಸ್ಸು ಹೊರಟಿತು.ಕೆಲವರು ಬಾಳೆಹಣ್ಣು ಸೇವನೆ ಮಾಡಿದೆವು.. ಮಾರ್ಗವಾದರೋ ಹಾವು ಹರಿಯುವಂತೆ ವಕ್ರ ವಕ್ರ..(ಅಲ್ಲಲ್ಲಿ ತುಂಡ ತುಂಡ..!!) ವಕ್ರ ಮಾರ್ಗದಲ್ಲಿ ಪಯಣಿಸುವಾಗ ನಮ್ಮಲ್ಲಿ ಹೆಚ್ಚಿನವರಿಗೆ ವಾಂತಿ ಮಾಡುವ ಅಭ್ಯಾಸವಿದೆ.. ನಿದ್ದೆಗೆಟ್ಟು ಸುದರಿಕೆ ಮಾಡಿದ್ದೆವು ಕೂಡಾ..ಹಾಗೆ ಅಲ್ಲಲ್ಲೇ ಅಡ್ಡಾದೆವು..ಕೆಲವರು ಬಸ್ಸೊಳಗೇ "ಕಾರು"ಬಾರು ಮಾಡಿದರು..೮.೦೦ ರ ಸುಮಾರಿಗೆ ಚಟ್ಟಳ್ಳಿಗೆ ತಲುಪಿದೆವು. ಎಲ್ಲರೂ ಕ್ಷೇಮವಿಲ್ಲದೇ ಬಂದರೂ..ಸ್ವಾಗತದಲ್ಲಿ ಮಾತ್ರ ಕ್ಷೇಮವಾಗಿ ಬಂದೆವೆಂದು ಹೇಳಿದೆವು..! ಎಲ್ಲರಿಗೂ ಯಥಾ ಶಕ್ತಿ ಇಡ್ಲಿ,ವಡೆ,ಶುಗರ್ ಲೆಸ್ (ಚಾ,ಕಾಪಿ,ಕಷಾಯ),ಶುಗರ್ ಪ್ಲಸ್ (ಚಾ,ಕಾಪಿ,ಕಷಾಯ), ಸೇವನೆಯಾಯಿತು..ಕಾರ್ಯಕ್ರಮ ಬಂಧಿತರು,
ಸಂಬಂಧಿತರು,ಅದರಲ್ಲಿ ತೊಡಗಿಕೊಂಡರು.ನಾವೆಲ್ಲಾ(ಸೌಂದರ್ಯ ಪ್ರಜ್ಞೆ ಉಳ್ಳವರು) ಮಡಿಕೇರಿಯ ಸೌಂದರ್ಯ ಆಸ್ವಾದನೆ ಮಾಡಲು ಹೊರಟೆವು..:)..(ಎಲ್ಲಿಗೂ ಹೋಗಲಿಲ್ಲಾ ಮತ್ತೇ..ಅಲ್ಲೇ ಎಸ್ಟೇಟ್ ಒಳಗೇ ತಿರುಗಾಡಿದ್ದಷ್ಟೇ..ಮದುವೆ ಮನೆಯಲ್ಲೂ ಸೌಂದರ್ಯ ಇರುತ್ತಲ್ಲಾ..ಅದೂ ಮಿಸ್ ಆಗಬಾರದಲ್ಲಾ..!!)ಮತ್ತೆ ಊಟ ಎಲ್ಲಾ ಮುಗಿಸಿ ಲಗು ಬಗೆಯಿಂದ(ಬಗೆಬಗೆಯಿಂದ..!) ಬಸ್ಸೇರಿದೆವು..
ಬಸ್ಸು ಮಡಿಕೇರಿಗೆ ತಲುಪಿದಾಗ ಆರ್.ಟಿ.ಓ ಪೋಲಿಸ್ ಬಸ್ಸನ್ನು ನಿಲ್ಲಿಸಿ ದಾಖಲೆ,ಅನುಮತಿ ಪತ್ರವನ್ನು ಕೇಳಿದರು..ಡ್ರೈವರ್ ನಲ್ಲಿ ದಾಖಲೆ ಬಿಡಿ..ಲೈಸೆನ್ಸ್ ಕೂಡಾ ಇರಲಿಲ್ಲ..! ಅನುಮತಿ ಪತ್ರವನ್ನು ಕೊಟ್ಟಾಗ ಇದಲ್ಲ ಎಂದರು(ಆಗ ಸಂಪಾಜೆ,ಮಡಿಕೇರಿ ಮಾರ್ಗ ದುರಸ್ತಿಯ ನಿಮಿತ್ತ ಮುಚ್ಚಿದ್ದರು..ಯಾರಾದರೂ ಹೋಗ ಬೇಕಿದ್ದರೆ ವಿಶೇಷ ಅನುಮತಿ ಪತ್ರವನ್ನು ಪಡೆಯಬೇಕಿತ್ತು.ನಾವು ಕೊಟ್ಟದ್ದು ಆ ಅನುಮತಿಪತ್ರ..ಆದರೆ ಆ ಬಸ್ಸು ಮಡಿಕೇರಿ-ಕಾಸರಗೋಡು ನಿತ್ಯ ಪ್ರಯಾಣದ ಬಸ್ಸು..ಅದಕ್ಕೆ ಮಡಿಕೇರಿಯಿಂದಾಚೆ ಅನುಮತಿಯಿರಲಿಲ್ಲ) ಪೋಲೀಸಿನವರು ಬಸ್ಸನ್ನು ಬಿಡಬೇಕಿದ್ದರೆ ಯಾವುದಾರೂ ಲೈಸೆನ್ಸ್ ಕೊಡಿ..ಆ ಮೇಲೆ ಬಸ್ಸಿನ ದಂಡ(ಫೈನ್)ಕಟ್ಟಿ ಲೈಸೆನ್ಸ್ ಬಿಡಿಸಿಕೊಳ್ಳಿ ಎಂದರು..ಹೇಗಿದ್ದರೂ ಎರಡುದಿನದಲ್ಲಿ ಲೈಸೆನ್ಸ್ ಬಿಡಿಸಿಕೊಡುವ ಆಶ್ವಾಸನೆ ಸಿಕ್ಕಿದ್ದರಿಂದ ನಾನು ಪರೋಪಕಾರದ ದೃಷ್ಟಿಯಿಂದ ನನ್ನ ಬೈಕಿನ ಲೈಸೆನ್ಸ್ ಕೊಟ್ಟೆ..!! ಅಂತೂ ಬಸ್ಸು ಹೊರಟಿತು..ರಾತ್ರೆ ೯.೦೦ಕ್ಕೆ ಊರಿಗೆ ತಲುಪಿದೆವು..ಡ್ರೈವರ್ ಹಣವನ್ನು ಪೂರ್ತಿ ಕೊಡಬೇಕೆಂದರೂ ಲೈಸೆನ್ಸ್ ಕೊಡಬೇಕಾದ ಬದ್ಧತೆಗಾಗಿ ೨.೦೦೦ ರೂಗಳನ್ನು ಬಾಕಿ ಮಾಡಿ ಉಳಿದ ಹಣವನ್ನು ಕೊಟ್ಟೆವು..
ಅದೇ ಕೊನೆ...ಆಮೇಲೆ ೫೦ ರಿಂದ ನೂರು ಕಾಲ್ ಗಳನ್ನು ಮಾಡಿದರೂ ಏಜೆಂಟ್ ನಿಂದಾಗಲೀ ಡ್ರೈವರ್ ನಿಂದಾಗಲೀ ಉತ್ತರವಿಲ್ಲ..ಲೈಸೆನ್ಸ್ ಮರಳಿಬರುವುದೆಂದು ವಾರ ಉರುಳಿ ತಿಂಗಳಾಯಿತು..ಎರಡಾಯಿತು ಮೂರಾಯಿತು ಸುದ್ದಿಯಿಲ್ಲ.. ನಮ್ಮ ಕೇರಳದಲ್ಲಾದರೋ ಬಹಳ ಕಟ್ಟುನಿಟ್ಟು.. ಒಂದೆರಡು ವಾರಕ್ಕೊಮ್ಮೆಯಾದರೂ ನಾನು ಹೋಗುವ ದಾರಿಯಲ್ಲಿ ತಪಾಸಣೆ(ಚೆಕಿಂಗ್) ಇರುತ್ತದೆ..ಲೈಸೆನ್ಸ್ ಇಲ್ಲದ ಕಥೆಯನ್ನು ನನ್ನಿಂದ ಕೇಳಿಸಿಕೊಂಡವರೆಲ್ಲಾ ನಕ್ಕಿದ್ದೂ ಅಲ್ಲದೆ."ನೀನಲ್ಲದೆ ಯಾರಾದರೂ ಲೈಸೆನ್ಸ್ ಕೊಡುವರೇ?"ಕಿವಿಮಾತನ್ನೂ ಹೇಳಿದವರೆಷ್ಟೋ..ಹೊರತು..ಮರಳಿಪಡೆಯಲು ಸಹಾಯ,ಅಥವಾ ದಾರಿಯನ್ನು ಹೇಳಿಕೊಡಲಿಲ್ಲ..ಅಂತೂ ಒಬ್ಬ ಹಿತೈಷಿ..ಹೇಗೂ ೨,೦೦೦ ರೂ ಬಾಕಿ ಇದೆಯಲ್ಲಾ. ಅದರಲ್ಲಿ ನೀನು ಕೇರಳದ ಲೈಸೆನ್ಸ್ ಮಾಡಿಸಿಕೊ ಎಂದರು(ಈ ಮೊದಲು ಇದ್ದದ್ದು ಕರ್ನಾಟಕದ ಲೈಸೆನ್ಸ್) ಹಾಗೆ ಕಾಸರಗೋಡಿಗೆ ಆರ್,ಟಿ,ಓ ಆಫೀಸಿಗೆ ಹೊಗಿ ಲೈಸೆನ್ಸಿಗಾಗಿ ಅರ್ಜಿ(ಅಪ್ಲಿಕೇಶನ್) ಕೇಳಿದರೆ ಆನ್ ಲೈನಿನಲ್ಲಿ ಅರ್ಜಿ ಗುರಾಯಿಸಬೇಕೆಂದರು..ನಾನು ಕೇರಳದಲ್ಲೇ ಹುಟ್ಟಿದ್ದರೂ..ಕಛೇರಿಗಳ ಅಧಿಕಾರಿಗಳೊಂದಿಗೆ ಮಲಯಾಳಮ್ ಮಾತನಾಡಲು ಕಷ್ಟವಾಗುತ್ತದೆ.ಆನ್ ಲೈನಿನಲ್ಲಿ ಅರ್ಜಿ ಗುರಾಯಿಸಲು ಅನೇಕ ಕಂಪ್ಯೂಟರ್ ಸೆಂಟರ್ಗಳಲ್ಲಿನವರಿಗೇ ಗೊತ್ತಿಲ್ಲ..!ಅದಕ್ಕೆ ಮತ್ತೆ,ರಕ್ತದ ಗುಂಪಿನ ಪ್ರಮಾಣ ಪತ್ರವಂತೆ,ಕಣ್ಣಿನ ಆರೋಗ್ಯದ ಪ್ರಮಾಣಪತ್ರವಂತೆ,
ಈ ರಕ್ತದ ಪ್ರಮಾಣ ಪತ್ರದ್ದೇ ಒಂದು ಕಥೆ..! ಕಾಲೇಜಿನಲ್ಲಿ ಕಲಿಯುತ್ತಿದ್ದಾಗ ಬಯೋಲಜಿ ಯ ಲ್ಯಾಬ್ ನಲ್ಲಿ ಬ್ಲಡ್ ಗ್ರೂಪ್ ಟೆಸ್ಟಿಂಗ್ ಕೂಡಾ ಇತ್ತು.ಅಲ್ಲಿ ಸರ್ ನೆದುರು ಟೆಸ್ಟ್ ಮಾಡಿ ಬಿ ನೆಗೆಟಿವ್ ಎಂದು ಬಂದಿತ್ತು..ಮುಜುಂಗಾವಿನಲ್ಲಿ ಗುರುಗಳು "ಸಾವಿರದ ಸಾವಿರ" ಎಂಬ ಹೆಸರಿನಲ್ಲಿ ರಕ್ತದಾನ ಶಿಬಿರ ಏರ್ಪಡಿಸಿದ್ದಾಗ ನಾನೂ ಭಾಗವಹಿಸಿದ್ದೆ..ಆದರೆ ಆಗ ಇಬ್ಬರು ಕಾಲೇಜು ವಿದ್ಯಾರ್ಥಿನಿಯರು ನನ್ನರಕ್ತ ಪರೀಕ್ಷೆ ಮಾಡಿ ಬಿ ಪೊಸಿಟಿವ್ ಎಂದಿದ್ದರು..ನನಗೆ ಆಶ್ಚರ್ಯವಾಗಿ ಪುನಃ ಕೇಳಿದಾಗ ಬಿ ಪೊಸಿಟಿವ್ ಎಂಬುದೇ ಸರಿ ಎಂದರು..ಸರಿ.. ಅದನ್ನೇ ಗಟ್ಟಿಯಾಗಿ ನಂಬಿ ಬೈಕ್ ನ ಮೇಲೆ,ನನ್ನ ಹೆಸರಿನೆದುರು ಎಲ್ಲಾ, ಬಿ+(ಎಂದರೆ ಯಾವತ್ತೂ ಧನಾತ್ಮಕವಾಗಿರಿ) ಎಂದು ಬರೆದೆ:). ಲೈಸೆನ್ಸ್ ಅರ್ಜಿಯಲ್ಲಿ ಬ್ಲಡ್ ಗ್ರೂಪ್ ಬಿ+ ಎಂದು ಬರೆದು ಅದನ್ನು ಅಧಿಕಾರಿಗೆ ನೀಡಿದೆ. ಅವರು ಇದರಲ್ಲಿ ಬರೆದರೆ ಸಾಲದು..ಪ್ರತ್ಯೇಕ ಸರ್ಟಿಫಿಕೇಟ್ ನೀಡಬೇಕೆಂದರು..ಥತ್..ಮತ್ತೆ ಕೆಲಸವಾಯ್ತಲ್ಲಾ ಎಂದು ಚಿಂತಿಸಿ..ಆಸ್ಪತ್ರೆಗೆ ಹೋಗಿ ರಕ್ತ ಪರೀಕ್ಷೆ ಮಾಡಿಸಿದೆ ಅಲ್ಲಿ ನೋಡಿದರೆ ಎ+ ಎಂದು ಪ್ರಮಾಣಪತ್ರ ನೀಡಿದರು. ನನಗೆ ತಲೆ ತಿರುಗುವುದೊಂದು ಬಾಕಿ..!!ಪುನಃ ಡಾಕ್ಟ್ರಲ್ಲಿಗೆ ಹೋಗಿ ಕೇಳಿ ಪರೀಕ್ಷೆ ಮಾಡಿಸಿದೆ ಅಲ್ಲೂ ಎ+ ಎಂದು ಫಲಿತಾಂಶ ಬಂತು ಅದನ್ನು ಆರ್,ಟಿ ಓ ಕಛೇರಿಗೆ ನೀಡಿದೆ..ಮೂರು ಬಾರಿ ರಕ್ತದ ಗುಂಪು ಬದಲಿದೆ.ಇನ್ನೂ ಬದಲುವುದಿದೆಯೇ ಎಂದು ದೇವರೇ ಹೇಳಬೇಕು..!
(ರಕ್ತ ಪರೀಕ್ಷೆ ಸರಿಯಾಗಿ ಮಾಡದಿದ್ದರೆ ಹೀಗೆಯೇ ಆಗುವುದು)
ಆಮೇಲೆ ಕಣ್ಣಿನ ಪರೀಕ್ಷೆಯಾಗಿ ಅದೂ ನಾರ್ಮಲ್ ಎಂದು ಉತ್ತರ ಬಂತು.ಡಾಕ್ಟರ್ "ಕಾಯ್ಚ ಶರಿ ಉಂಡೋ..?" ಎಂದದ್ದು ಅರ್ಥವಾಗದೆ ಗಲಿಬಿಲಿಯಾಯಿತು..ಮತ್ತೆ ತಿಳಿಯಿತು ಆಕೆ ಎಂದದ್ದು.."ದೃಷ್ಟಿ ಸರಿ ಇದೆಯೋ...?" ಎಂದು..!!
ಕೊನೆಗೆ ಅಂತೂ ಇಂತೂ ಎಲ್,ಎಲ್,ಆರ್ ಪರೀಕ್ಷೆ ಬರೆದು ಪಾಸ್ ಆದೆ.. ಇನ್ನು ಆರು ತಿಂಗಳು ವಾಯಿದೆ,ಅಷ್ಟರೊಳಗೆ ಲೈಸೆನ್ಸ್ ಮಾಡಬೇಕು... ಟು ವ್ಹೀಲರ್ ನನಗೆ ಹೇಗೂ ಅಭ್ಯಾಸವಿದ್ದುದರಿಂದ (ಹಾಗೆಂದು ನನಗೆ ಕರ್ನಾಟಕದ ಲೈಸೆನ್ಸ್ ಇದೆಯೆಂಬ ಸಂಗತಿಯಾಗಲೀ, ಟು ವ್ಹೀಲರ್ ರೈಡಿಂಗ್ ಅಭ್ಯಾಸವಿದೆಯೆಂದಾಗಲೀ ಹೇಳಲಿಲ್ಲ..! ಹೇಳಿದರೆ ಇಷ್ಟು ಸಮಯ ಲೈಸೆನ್ಸ್ ಇಲ್ಲದೆ ಹೇಗೆ ಗಾಡಿ ಓಡಿಸಿದ್ದೆಂಬ ಪ್ರಶ್ನೆ.ಅಮೇಲೆ ಪ್ರಶ್ನೆಯ ಮೇಲೆ ಪ್ರಶ್ನೆ ಬೆಳೆದು ಅದೇ ದೊಡ್ಡ ಮಲಯಾಳಿಗಳ "ಪ್ರಶ್ಣೆ" ಯಾಗ ಬಹುದು..!!) ನಾನು ವಾರದೊಳಗೆ ಮಾಡಲಿಕ್ಕಾಗುತ್ತದೋ ಎಂದು ಕೇಳಿದಾಗ ಮಿನಿಮಮ್ ಒಂದು ತಿಂಗಳು ಕಾಯಬೇಕೆಂದರು..
ಇತ್ತ ಕರ್ನಾಟಕದ ಲೈಸೆನ್ಸ್ ಮರಳಿ ಪಡೆಯಲು ಪ್ರಯತ್ನ ಆಗುತ್ತಲೇ ಇತ್ತು..ಏಜೆಂಟ್ ಗಳಿಗೆ ಫೋನ್ ಮಾಡುವುದು ಬೈಯುವುದು..ಫಲಿತಾಂಶ ಮಾತ್ರ ಶೂನ್ಯ..:(
ಒಂದು ತಿಂಗಳಿನ ನಂತರ ಕೊಟ್ಟ ತಾರೀಖಿನಂದು ಟೆಸ್ಟ್ ಕೊಡಲು ಹೋದೆ. ನನ್ನದು ಕರ್ನಾಟಕದ ರಿಜಿಸ್ಟ್ರೇಷನ್ ಬೈಕ್.ಕೇರಳದ ವಾಹನದಲ್ಲೇ ಟೆಸ್ಟ್ ಕೊಡಬೇಕಂತೆ..ಅದೂ ಟೆಸ್ಟ್ ಎಂದರೆ ಕೇವಲ "ಎಂಟು೦೦" ಆಕೃತಿಯಲ್ಲಿ ಬರೆದರೆ ಸಾಲದು..! "೦೦೦"ಎಂಬ ಆಕೃತಿಯಲ್ಲಿ ಬರೆಯಬೇಕು..!ಬಹುಷಃ ನನ್ನ ಕಣ್ಣಳತೆಯಲ್ಲಿ ಹೇಳುವುದಿದ್ದರೆ ಅದರ ಒಟ್ಟು ಉದ್ದಗಲ ೩><೧೦ ಮೀಟರ್ ಅಳತೆಯಿರಬಹುದಷ್ಟೇ..! ಮತ್ತೆ ಅಲ್ಲಿಗೆ ಟೆಸ್ಟ್ ಕೊಡಲು ಬಂದಿದ್ದ ಡ್ರೈವಿಂಗ್ ಸ್ಕೂಲ್ ಏಜೆಂಟ್ ಅನ್ನು ಮಾತಾಡಿಸಿ ೨೫೦ ರೂಪಾಯಿಗೆ ಟೆಸ್ಟ್ ಗಾಗಿ ಅವರ ಎಂ.ಎಯ್ಟಿ ಕೊಡಲು ಒಪ್ಪಿಸಿದೆ.(ಇಷ್ಟೆಲ್ಲಾ ಟೆಸ್ಟ್ ಪಾಸಾದರೂ ಪರ್ ಪರ್ಸನ್ ೨೫೦ ರುಪಾಯಿ ಲಂಚ ಕೊಡಬೇಕಂತೆ..! ಬೆಳಿಗ್ಗೆ ಅಲ್ಲಿ ಟ್ರ್ಯಾಕ್ ಹಾಕಿರುತ್ತಾರೆ. ಅದರಲ್ಲಿ ನನ್ನ ಬೈಕ್ ನಲ್ಲಿ ಟ್ರ್ಯಾಲ್ ಪಾಸಾದ್ದೂ ಆಯಿತು.ಎಮ್.ಎಯ್ಟಿಯಲ್ಲೂ ಆಯಿತು..ಆದರೆ ಆರ್.ಟಿ ಓ ಎದುರು ಟೆಸ್ಟ್ನಲ್ಲಿ ಫೇಲ್..!!ಮಧ್ಯದಲ್ಲಿ ಕಾಲು ಕೊಟ್ಟೆ..ಇನ್ನು ಒಂದು ತಿಂಗಳು ಕಳೆದು ಪುನಃ ಪರೀಕ್ಷೆ..!!
ಮಧ್ಯೆ ಅನೇಕ ಕಾರ್ಯಕ್ರಮಗಳು..ಅವುಗಳೆಡೆಯಲ್ಲಿ ಹೋಗಲಿಕ್ಕಾಗದೇ.ಒಂದೆರಡುಬಾರಿ ಟೆಸ್ಟ್ ಡೇಟ್ ಬದಲಿಸಿದ್ದೂ ಆಯಿತು.ಕೊನೆಗೆ ಜನವರಿಯ ಮೊದಲು ಇದ್ದ ಕಾರ್ಯಕ್ರಮಕ್ಕೆ ಬದಲೀ ವ್ಯವಸ್ಥೆ ಮಾಡಿ ಟೆಸ್ಟ್ ಕೊಡಲು ಹೋದೆ.ಈಗ ವಾರದಲ್ಲೇ ಟೆಸ್ಟ್ ಕೊಡಬಲ್ಲೆನೆಂಬ ಹಮ್ಮು ಇಳಿದು ಹೋಗಿತ್ತು..!ಅಲ್ಲಾದರೂ ಟೆಸ್ಟ್ ಪಾಸಾಗಬಹುದೆಂದು ಆಸೆಯಿಂದ ಹೋದೆ.ಟೆಸ್ಟ್ ಕೊಡುವ ಜಾಗವನ್ನು ಬೇರೆಲ್ಲೋ ಬದಲಿಸಿದ್ದರು ಅದನ್ನು ಹುಡುಕಿ ಅಲ್ಲಿಗೆ ತಲುಪುವಾಗಲೇ ತಡವಾಗಿತ್ತು.ಹಾಗಾಗಿ ಟ್ರ್ಯಾಲ್ ತೆಗೆಯಲು ಆಗಿರಲಿಲ್ಲ..ನೇರವಾಗಿ ಟೆಸ್ಟ್ ಕೊಡಬೇಕಿತ್ತು. ಅದೂ ಅಲ್ಲದೆ ನನಗೆ ಪರಿಚಯವಿರುವ ಒಂದೆರಡು ಹುಡುಗಿಯರೂ ಅಲ್ಲಿಗೆ ಬಂದಿದ್ದರು ಅವರೆಲ್ಲಾ ಒಂದೇ ಬಾರಿ ಟೆಸ್ಟ್ ಪಾಸಾದರು..! ನನಗೆ ನರ್ವಸ್ನೆಸ್ ಕೂಡಾ ಆಯಿತು..! ಈಬಾರಿ ಮೊದಲಿನಂತಾಗಲಿಲ್ಲ..ಎಲ್ಲ ಸರಿಯಾಗಿ ಟ್ರ್ಯಾಕ್ ನಿಂದ ಹೊರ ಬರುವಾಗ ಕೊನೆಯ ಒಂದು ಕಂಬಿ ಬೀಳಿಸಿದೆ..!! ಪುನಃ ಫೇಲ್..!! ಈಬಾರಿಯಂತೂ ಆದ ನಿರಾಸೆ,ಹತಾಶೆ,ಬೇಸರ,ಅವಮಾನ ಅಷ್ಟಿಷ್ಟಲ್ಲ.. :(( ನೇರವಾಗಿ ಮನೆಗೆ ಬಂದು ಅಮ್ಮನಲ್ಲಿ ಫೇಲ್ ಎಂದು ಹೇಳಿದೆ..
ಆದರೆ ಯಾವ ನಿರಾಶೆಯಿದ್ದರೂ ಹೆಚ್ಚೆಂದರೆ ಒಂದು ದಿನ. ಆಮೇಲೆ ಹೇಗಾದರೂ ಸರಿ ಕರ್ನಾಟಕದ ನನ್ನ ಕಳೆದ ಲೈಸೆನ್ಸ್ ಅನ್ನೇ ಪಡೆಯುವುದೆಂದು ತೀರ್ಮಾನಿಸಿ..ಮಡಿಕೇರಿಯ ಆರ್,ಟಿ,ಓ ಆಫೀಸ್ ಗೆ ಹೋಗಿ ಈ ಕುರಿತು ವಿವರಿಸಿ.. ವಿವರ ಕೇಳಿದಾಗ..ಅದನ್ನು ಆ ಬಸ್ಸಿನ ಮಾಲೀಕರು ದಂಡ ಪಾವತಿಸಿ ತೆಗೆದುಕೊಂಡು ಹೋಗಿದ್ದಾರೆಂದು ಹೇಳಿದರು..ನಾನು ನೇರವಾಗಿ ಆ ಮಾಲೀಕರ ಮೊಬೈಲ್ ನಂಬ್ರವನ್ನು ತೆಗೆದುಕೊಂಡು ಈಕುರಿತು ವಿಚಾರಿಸಿದಾಗ ಓತಪ್ರೋತವಾಗಿ ನನ್ನನ್ನು ಬೈಯಲಾರಂಭಿಸಿದರು.. "ನಿಮಗೆ ನಮ್ಮ ಕಷ್ಟವೇನು ಗೊತ್ತು? ೪೫೦೦೦ ರೂ ದಂಡ ಪಾವತಿಸ ಬೇಕಾಯಿತು..ನಿಮ್ಮ ಲೈಸೆನ್ಸ್ ಬಂದಿದೆಯೆಂದು ನಾವು ತಿಳಿಸಿ ಹೆಳಬೇಕಾ? ನಿಮಗೆ ಅಷ್ಟೂ ಜವಾಬ್ದಾರಿಯಿಲ್ಲವೇ,,? ನಮ್ಮ ಬಸ್ಸಿಗೊದಗಿದ ಸಮಸ್ಯೆಯನ್ನು ನಾವೇ ಬಗೆಹರಿಸಿಕೊಳ್ಳುತ್ತಿದ್ದೆವು.. ನೀವೇಕೆ ಲೈಸೆನ್ಸ್ ಕೊಟ್ಟಿರಿ..?" ಎಂದು ನಾನೂ ಬೈಯಬಹುದಿತ್ತು..ಏಕೆಂದರೆನನಗೂ ಇದರಿಂದ ಸಾಕಷ್ಟು ಹಾನಿಯಾಗಿತ್ತು.. ಆದರೆ ಅದರಿಂದ ನನಗೇ ಹಾನಿಯೆಂದು ತಿಳಿದು ಅವರ ಆಫೀಸಿನ ಜಾಗವನ್ನು ವಿಚಾರಿಸಿದೆ.ಆಮೇಲೆ ಒಂದು ದಿನ ಆಫೀಸಿಗೆ ಹೋದಾಗ ಮನೆಯಲ್ಲಿದ್ದಾರೆಂದು ತಿಳಿಯಿತು.ಅವರ ಮನೆ ಅಲ್ಲೇ ಹತ್ತಿರದಲ್ಲಿ ಎಂದು ತಿಳಿದು ಅಲ್ಲಿಗೇ ಹೋದೆ...ಮನದಲ್ಲಿ ಮಾತ್ರ ಫುಕುಫುಕು ಹೆದರಿಕೆ...!! ಎಲ್ಲಿಯಾದರೂ ಈ ಮನುಷ್ಯ ಬೈದರೆ..? ನನಗೆ ಹಾಗೆಲ್ಲಾ ಬೈಸಿಕೊಂಡು ಅಭ್ಯಾಸವಿಲ್ಲ..ಅದರಲ್ಲೂ ಸಾರ್ವಜನಿಕವಾಗಿ ಬೈದರೆ..? ಯಾಕೆ ಬೈಯುತ್ತಾರೆಂದು ಕೇಳಬೇಡಿ..ಹಣ ನಷ್ಟವಾದವರು ಎಲ್ಲರೂ ನಮ್ಮಂತೆ ಇರುವುದಿಲ್ಲ.. ಕಾರಣವಿಲ್ಲದೇ ಯಾವಾಗ ಯಾರ ಮೇಲೆ ಬೇಕಾದರೂ ರೇಗಾಡಬಹುದು. ನಾನು ಅವರ ಮನೆಗೆ ಹೋಗಿ ಪರಿಚಯ ತಿಳಿಸಿ "ಮದುವೆಯಲ್ಲಿ ಎಲ್ಲರೊಂದಿಗೆ ಹೋದವರಲ್ಲಿ ನಾನೂ ಒಬ್ಬನೇ ಹೊರತು ಇದರ ಮುಖ್ಯ ವ್ಯಕ್ತಿ ನಾನಲ್ಲ ಎಂದು ತಿಳಿಸಿದೆ. ಅವರ ಕೋಪ ತಣ್ಣಗಾಗಿತ್ತೆನಿಸುತ್ತದೆ."ಮೊನ್ನೆ ಕಾಲ್ ಮಾಡಿದ್ದಾಗ ನೀವೇ ಅ ಮದುವೆಯ ಪಾರ್ಟಿಯ ವ್ಯಕ್ತಿಯೆಂದು ನಾನು ತಿಳಿದು ಬೈದದ್ದೆಂದು ಹೇಳಿ ನೇರವಾಗಿ ಒಳ ಹೋಗಿ ಲೈಸೆನ್ಸ್ ತಂದು ಕೊಟ್ಟರು..!!!
ನನಗೆ ಆದ ಸಂತೋಷ ಅಷ್ಟಿಷ್ಟಲ್ಲ ಕೇರಳದ ಟೆಸ್ಟ್ ನಲ್ಲಿ ಆದ ನಿರಾಸೆ,ಹತಾಶೆ,ಬೇಸರ,ಅವಮಾನ ಎಲ್ಲಾ ಈ ಸಂತೋಷದ ಎರಡು ಕಣ್ಣ ಹನಿಯಲ್ಲಿ ತೊಳೆದು ಹೋಯಿತು.. ಬದುಕಿದೆಯಾ ಬಡಜೀವವೇ ಎಂದೆ. ಆಮೇಲೆ ಅವರಲ್ಲಿ ಆದ ಕಾರಣ ವಿವರಿಸಿ ಅವರು ನನಗೆ ಲೈಸೆನ್ಸ್ ಕೊಟ್ಟಿದ್ದಕ್ಕಾಗಿ ಧನ್ಯವಾದವನ್ನೂ,ನಾನು ಆರ್.ಟಿ ಓ.ಗೆ ಕೊಟ್ಟಿದ್ದಕ್ಕಾಗಿ ಸಂತಾಪವನ್ನೂ(ಕ್ಷಮೆ ಕೇಳಲಿಲ್ಲ ಏಕೆಂದರೆ ನಾನು ತಪ್ಪು ಮಾಡಿರಲಿಲ್ಲವೆಂದು ನನ್ನ ಭಾವನೆ..) ತಿಳಿಸಿ ಹೊರಟೆ...
ಈ ಒಂದು ವರ್ಷದಲ್ಲಿ ನಿತ್ಯ ರುದ್ರ ಜಪ ಪಠನ ಮಾಡುತ್ತಿದ್ದೆ.ಏಕೆಂದರೆ (ನೀವು ನಂಬುತ್ತೀರೋ ಬಿಡುತ್ತೀರೋ)ಜ್ಯೋತಿಷ್ಯ ಪ್ರಕಾರ ನನಗೆ ರವಿ ದಶಾ..ನನ್ನ ಜಾತಕದಲ್ಲಿ ರವಿ ಒಳ್ಳೆಯ ಸ್ಥಾನದಲ್ಲಿಲ್ಲಿದ ಕಾರಣ ರವಿಯೆಂದರೆ ಆರೋಗ್ಯ,ಸರ್ಕಾರಿ ವಿಷಯಗಳಿಗೆ ಕಾರಕತ್ವವಿರುವ ಕಾರಣ ನನಗೆ ಆರೋಗ್ಯದ ಸಮಸ್ಯೆಯಿಲ್ಲವಾದರೂ. ಸರ್ಕಾರಿ ಸಮಸ್ಯೆಯೊಂದು ಭೂತಾಕಾರವಾಗಿ ಕಾಡಿತು.. ಈ ಒಂದು ವರ್ಷದಲ್ಲಿ ಅನೇಕ ಬಾರಿ ಚೆಕಿಂಗ್ ಮೂಲಕ ಹೋಗಿದ್ದೇನೆ ಯಾವತ್ತೂ ನನ್ನ ಮುಂದಿನವರನ್ನು,ಹಿಂದಿನವರನ್ನು ನಿಲ್ಲಿಸಿ ಚೆಕ್ ಮಾಡಿದ್ದರಾಗಲೀ ನನ್ನನ್ನು ಒಮ್ಮೆಯೂ ನಿಲ್ಲಿಸಲಿಲ್ಲ..!! ನಾವು ಶುದ್ಧ ಮನಸ್ಸಿನಿಂದ ದೇವರನ್ನು ಪ್ರಾರ್ಥಿಸಿದರೆ ನಮ್ಮ ಕಷ್ಟ ಕಾಲದಲ್ಲಿ ಯಾವತ್ತೂ ಅವನು ಕಾಪಾಡುತ್ತಾನೆಯೆಂಬುದು ನನಗೆ ಪ್ರತ್ಯಕ್ಷವಾಗಿ ಅನುಭವವಾಯಿತು.ಹಾಗಾಗಿ ಜಾತಕದಲ್ಲಿ ದೋಷವಿದೆಯೆಂದು ಹೆದರ ಬೇಕಾದ್ದಿಲ್ಲ.ನಮ್ಮ ಕಷ್ಟಗಳಿಗೂ,ಸುಖಕ್ಕೂ ನಾವೇ ಉತ್ತರದಾಯಿಗಳು.ಸಮಸ್ಯೆ ಮುಗಿದರೂ ನಿತ್ಯ ಹೈವೇ ಯಲ್ಲಿ ಪಯಣ, ದಿನಕ್ಕೊಂದು ಅಪಘಾತ ಕಾಣುವಾಗ ನಮ್ಮ ಸುರಕ್ಷತೆಗಾಗಿ ದೇವರ ಸ್ಮರಣೆಯೇ ನಮ್ಮ ರಕ್ಷಾ ಕವಚ. ಹಾಗಾಗಿ ರುದ್ರಪಠಣ ನಿತ್ಯ ನಡೆಯುತ್ತಿದೆ. ಯಾಕೆಂದರೆ ನಮಾಮಿ ಶಿರಸಾ ದೇವಂ ಕಿಂ ನೋ ಮೃತ್ಯುಃ ಕರಿಷ್ಯತಿ..?ಅವನಲ್ಲವೇ ಕಾಯವವನು..?:)
ನಿಮ್ಮ ಅನಿಸಿಕೆ ಏನು..?
ಚುಟುಕ "೭೧-೮೦"
೭೧."ಸಾಧನೆ"
ಕರೆಯುತಿದೆ ನಿನಗಾಗಿ ಸಾಧಿಸಲು ಜಗದಂಗಳ..
ಅರಿಯುತಿರೆ ಹೊಸದಾಗಿ ಬಾಧಿಸುವುದು ನಿನ ಕಂಗಳ..
ಸುರಿಯುತಿರೆ ಶ್ರಮವೆಲ್ಲ ಯಶವಾದಂತೆ ಬೆಳದಿಂಗಳ..
ಸಿರಿಯ ತೊರೆ ಕ್ರಮದಲ್ಲಿ ವಶವಾದಂತೆ ಮಂಗಳ...
೭೨."ವಿಜ್ಞಾನ-ಅಧ್ಯಾತ್ಮ"
ವಿಜ್ಞಾನಿ ಮಾಡಿದ ಸಹಜ ನರ ಶಿಶುಪ್ರನಾಳ
ಸುಜ್ಞಾನಿ ಹಾಡಿದ ಮೋಡಿ ಸುಜನರ ಶಿಶುನಾಳ
ಅಜ್ಞಾನ ಕಡಿದು ನೋಡಿ ತಿಳಿಯಿರೆಂದ ಬದುಕಿನಾಳ
ಪ್ರಜ್ಞೆಯಿಂದೆರಡೂ ಸಮಪಾಕವಾಗಿಸಿ ಬದುಕು ನಿರಾಳ..
೭೩."ಮನಸ್ಸು"
ಬುದ್ಧಿಯೊಂದಿಗೆ ಸ್ಥಿಮಿತದಲ್ಲಿರಲಿ ತುರಂಗ
ಬದ್ಧತೆಯಿಂದ ಚಿತ್ತದಲ್ಲಿ ಹಾರಾಡಲಿ ತಿರಂಗ
ಶುದ್ಧನೀರಿಗೆ ಒರತೆ ಮೂಲವಿದ್ದಂತೆ ಸುರಂಗ
ಸಿದ್ಧದಾರಿಗೆ ಅರಿತ ಕಾಲನಿರುವ ಶ್ರೀರಂಗ
೭೪."ಶ್ರಮ-ಅದೃಷ್ಟ"
ಗಿರಿಯೆಡೆಗೆ ಸಾಗಲು ಚೆನ್ನ ಒಂದೊಂದೆ ಮೆಟ್ಟಿಲು..
ಗುರಿಯದುವೆ ಸಿಗಲು ಚಿನ್ನ ತೂಗಿದಂತೆ ತೊಟ್ಟಿಲು..
ಭಾರವಾದರೂ ನೀರೆರೆದು ಧವಸ ಕದಿರು ಕಟ್ಟಲು..
ಬಿರಿಯುವುದು ತುಂಬುವುದು ಆತ್ಮತೃಪ್ತಿಯ ಬಟ್ಟಲು..
೭೫. "ಬದುಕು"
ಬಾಳಿನ ಪಾಠದಲ್ಲಿದೆ ಅನೇಕ ಸರ್ಗ..
ತಿಳಿಯದ ತಿರುವುಗಳಲ್ಲಿ ತಪ್ಪಿ ಬಿದ್ದರೆ ವಿಸರ್ಗ..
ಕಳೆಯದೆ ಬಳಸಿದರೆ ಉಳಿಸುವುದು ನಿಸರ್ಗ..
ತೊಳೆಯುವುದು ಮನದ ಕೊಳೆಯ ಸಜ್ಜನರ ಸಂಸರ್ಗ..
೭೬. "ಬದಲಾವಣೆ"
ಆರತಿಯೊಂದಿಗೆ ಕೀರುತಿ ತರುವಳು ಮಗಳು..
ಸರದಿ ಬಂದಿದೆ ಹುಡುಗಿ ಮುಖದಲ್ಲೂ ಮುಗುಳು..:)
ಸರಿದಾರಿಗೆ ಬರುವಲ್ಲಿ ಬಾಕಿ ಇನ್ನೊಂದು ಮಗ್ಗಲು..
ಕರಟಿ ಹೋಗುತಿವೆ ಗಂಡು ಧಾರ್ಷ್ಟ್ಯಕೆ ಕೆಲ ಮೊಗ್ಗುಗಳು..:(
೭೭."ಸ್ತ್ರೀ"
ಮೈಯೆಲ್ಲ ಕಣ್ಣಾಗಿ ಗಮನಿಸುವರು ಅವಳ ಪ್ರಾಯ..
ನಯವಾಗಿ ಹೆಣ್ಣೆಂದು ಮನ್ನಿಸರು ಸದಭಿಪ್ರಾಯ..
ಬಯಸುವುದು ತರವಲ್ಲ ಆಕೆ ನಿಮ್ಮ ಛಾಯಾ..
ದಯಪಾಲಿಸುವಳು ತರುವಲ್ಲಿ ಹಣ್ಣಂತೆ ಆದರೂ ಗಾಯ..
೭೮."ನನ್ನ ದೇಶ"
ಬಡವಾಗಿ ಇದ್ದರೂ ಬಾಳಿಗೊಂದೇ ತವರು..
ದೃಢವಾಗಿ ಬದ್ಧರು ನಮ್ಮಏಳಿಗೆಗೆ ಹೆತ್ತವರು..
ಗಡಿಯಲ್ಲಿ ಸಿದ್ಧರು ದೇಶ ಸೇವೆಗೆ ಹಿತವರು..
ಗುಡಿಯಲ್ಲಿ ಶುದ್ಧನ ಕಾಯ್ವ ಬಾಗಿಲಿನ ಗುರುತವರು..
೭೯."ಗೆಲುವು"
ಎಸೆದರೇನಂತೆ ನಿನ್ನ ನೆತ್ತಿಗೆ ಕಲ್ಲು..
ವಸಿಯದರ ಜೋಡಿಸಿ ಹತ್ತಿ ನೀ ನಿಲ್ಲು..
ಹುಸಿನಕ್ಕು ಮುರಿದರೂ ಶ್ರಮದ ಗೆಲ್ಲು..
ಉಸುಕಲೂ ಚಿಗುರಾಗಿ ಛಲದಿ ಗೆಲ್ಲು..!
೮೦."ನರ-ನಾರಾಯಣ"
ವರ್ತಿಯಿಂದಲೆ ಬೆಳಗದು ಮನೆಯ ಹಣತೆ..
ಭಕ್ತಿಯಿಂದಲೆ ತೊಲಗದು ಮನದ ಖಿನ್ನತೆ..
ಯುಕ್ತ ಹಂಚಲು ಶ್ರೀಶೈಲನೇ ಹಸಿದ ಜನತೆ..
ಮುಕ್ತ ನೀ ಹಚ್ಚು ತೈಲದಿ ಋಷಿಯ ಮಹಾನತೆ..
Thursday 1 March 2012
ಚುಟುಕ "೬೧-೭೦"
೬೧. "ಹೊಸತು-ಹಳತು"
ಆಪತ್ತು ಪಿಜ್ಜಾ ದೇಹಕ್ಕೆ, ಸಾಕು ಉಪ್ಪಿಟ್ಟು ಸಜ್ಜಿಗೆ..
ಒಪ್ಪತ್ತು ಕಜ್ಜಾಯ ದಾಹಕ್ಕೆ ಬೇಕು ಸಾಕಷ್ಟು ಮಜ್ಜಿಗೆ..
ತಪ್ಪದಿರಲಿ ಅಜ್ಜನ ಸಹವಾಸ,ಮದ್ದಾಗುವುದು ಗೊಜ್ಜಿಗೆ..
ಮುಪ್ಪಾದರೂ ಮಜ್ಜನ ಹವ್ಯಾಸ,ಮುದ್ದಾಗುವುದು ಅಜ್ಜಿಗೆ..
೬೨. "ಜೀವನ"
ಕರುಳು ಸಾಕುವಾಗ ಇಪ್ಪತ್ತರವರೆಗೆ ಅರಳು..
ಕೆರಳಿ ಬದುಕುವಾಗ ನಲ್ವತ್ತರಸರಿಗೆ ಹೊರಳು..
ಮರುಳು ಮೆಲುಕಿನೊಳಗೆ ಅರುವತ್ತರೊಳಗೆ ಉರುಳು..
ನರಳಿ ಸಿಲುಕದೆಯೇ ಎಂಭತ್ತರಲ್ಲಿ ಇಲ್ಲಿಂದ ತೆರಳು..!
೬೩. "ಅಹಿಂಸಾ ಪರಮೋ ಧರ್ಮಃ ಧರ್ಮ ಹಿಂಸಾ ತಥೈವ ಚ"
ಬುದ್ಧನಾದರೂ ಮಣ್ಣಿನಲಿ ಉಡಿ ಬಿಚ್ಚಿದ ಜಗಜಟ್ಟಿ ಮೊರೆದಂತೆ..
ಬದ್ಧನಾಗು ಕಣ್ಣಿನಲಿ ಕಿಡಿ ಹಚ್ಚಿದ ರುದ್ರನ ಮೋರೆಯಂತೆ..!
ಶುದ್ಧನಾದರೂ ಕಣದಲ್ಲಿ ವೈರಿ ತರಿಯಲು ಖಡ್ಗದ ಒರೆಯಂತೆ..
ಸಿದ್ಧನಾಗು ಕ್ಷಣದಲ್ಲಿ ತಿರಿ ಉರಿಯಲು ಅಗ್ನಿಯ ಒರೆದಂತೆ..!!
೬೪. "ಶಿಕ್ಷಣ"
ಬೋಧನೆಗೆ ಇರಲಿ ಯೋಗ್ಯ ಗುರುವಿನ ವರಣ
ಸಾಧನೆಗೆ ಬರಲಿ ಯೋಗ ಸೂತ್ರಗಳ ಆವರಣ
ಬಾಧಿಸದೆ ಆಳ್ವಿಕೆ ತರಲಿ ಬಾಲಕರ ಶಿಕ್ಷಣಕೆ ಭರಣ
ಶೋಧಿಸುತ ಮಾಲಿಕೆ ಬೀರಲಿ ಪಾಲಕರ ಮೆಚ್ಚಿನ ಆಭರಣ(ಮಕ್ಕಳು)
೬೫. "ವೀರ ಸಂನ್ಯಾಸಿ"
ಮಲಗಿದ್ದ ಖಂಡ ಮೇರುಗಳ ಸಾವರಿಸಿದ ಸಂತ
ನಲುಗಿದ್ದ ಕಾಂಡ ಬೇರುಗಳ ಚಿಗುರಿಸಿದ ವಸಂತ
ಒಳಗಿದ್ದ ಭಂಡ ಸೆಣಸುಗಳ ಕಮರಿಸಿ ನೀ ಶಾಂತ
ಬೆಳಗೆದ್ದು ಕಂಡ ಕನಸುಗಳ ನಿವಾರಿಸಿ ನಿಶಾಂತ
೬೬. "ಕಿಡಿ ನುಡಿ"
ಕನ್ನೆ ಬಿರಿದ ಹೂವಿನಂತೆ ಹತ್ತಿರ ಕೊಂಚ ಮಡುಗಿ..
ಎಣ್ಣೆ ಕರಿದ ತಾವಿನಂತೆ ಬಿಟ್ಟಿರ ಸಂಚ ಬೆಡಗಿ..
ಕಣ್ಣು ಹರಿಯಿತೊಂದು ಇಪ್ಪತ್ತರ ಅಂಚ ಹುಡುಗಿ..
ಕೆನ್ನೆ ಉರಿಯಿತಿಂದು ತತ್ತರ ಮಿಂಚು ಗುಡುಗಿ..!!
೬೭. "ಮಿಡಿ"
ತನು ಸುಂದರ ಮಿಡಿಯಲಿ
ಮನ ಹಗುರ ಕಾಮಿಡಿಯಲಿ
ಕ್ಷಣ ತತ್ತರ ಸಿಡಿ ಮಿಡಿಯಲಿ
ಮಣ ಕಾತರ ಅಪ್ಪೆಮಿಡಿಯಲಿ..
೬೮. "ನನ್ನ ದೇಶ"
ಭಾವ ರಾಗ ತಾಳದಲ್ಲಿ ಹೊಂದಿರುವೆ ಲಯ..
ಜೀವ ಸರಾಗ ತೋಳಿನಲ್ಲಿ ಬೆಳೆದಿದೆ ಮಲಯ..
ಶಿವ ರಂಗಸ್ಥಳ ಬಾಳಿನಲ್ಲಿ ಕಳೆಗಟ್ಟಿದೆ ಹಿಮಾಲಯ..
ಅವನಿಯೊಳಗೆ ನೀ ನನ್ನ ಧಮನಿ ಮಹಿಮಾಲಯ..
೬೯. "ನಾಯಕ"
ಆಗಬಯಸುವರು ಜನರೊಳಗೆ ನಾಯಕ..
ಬಾಗಿ ಕೈಕೆಸರು ಬೆವರಾಗದೆ ಕಾಯಕ
ಹುಗಿದು ನೀರೆರೆಯದೆ ಬೀಜ ಅಸಹಾಯಕ..
ಮಾಗಿ ನೆರಳಾದರೆ ಬದುಕು ಫಲದಾಯಕ..
೭೦. "ವಿಜ್ಞಾನಿ"
ಸುಮ್ಮನಿರದೆ ಮಾಡಿಕೊಳ್ಳುವೆ ನಾ ಆತ್ಮ ಶೋಧನೆ..
ನಮಗಾಗಿ ಹಗಲಿರುಳು ನೀ ಮಾಡುವೆ ಸಂಶೋಧನೆ..
ನೆಮ್ಮದಿಯೊಳಗೆ ನಿನಗೂ ಇರಬಹುದಲ್ಲವೆ ವೇದನೆ..
ನಮನವಿದೋ ವಿಜ್ಞಾನಿಯೆ ಹೃದಯಾಳದ ಸಂವೇದನೆ..
Friday 17 February 2012
ಚುಟುಕ"೪೧-೬೦"
೪೧."ಲಂಚ"
ಕೆಲಸವೊಂದು ಆಗಬೇಕೆ ಗುರಾಯಿಸಿ ಅರ್ಜಿ..
ವಲಸೆ ಮಾಡುತಿರೆ ಚುಚ್ಚಿ ಗುರಾಯಿಸುವರು ಭರ್ಜಿ..
ಹೊಲಸೆ ಲಂಚವ ಕೊಡುತಿರೆ ತಿರುಗುವುದು ಮನ ಗುರ್ಜಿ,
ಲಾಲಸೆಯಿಂದ ಮುಗಿಸುವುದು ಹಣವೆಂಬ ಮರ್ಜಿ,
೪೨."ಗೆಲ್ಲೋಣ"
ಹುಟ್ಟುತಾ ಮನೆಯಲ್ಲಿ ವ್ಯಕ್ತಿ ಶ್ರೀಸಾಮಾನ್ಯ,
ಕಟ್ಟುತಾ ಮನದಲ್ಲಿ ವ್ಯಕ್ತ ಅಸಾಮಾನ್ಯ,
ಬಿಟ್ಠಾಕಿ ಸೋಲಲು ವೇದನೆಯ ದೈನ್ಯ,
ಒಟ್ಠಾಕಿ ಗೆಲ್ಲಲು ಸಂವೇದನೆಯೆ ಧನ್ಯ..
೪೩."ಕ್ರಾಂತಿಕಾರಿಗಳು"
ಅತಂತ್ರ ವಾಸದಲ್ಲಿ ಕೊಟ್ಟಿರಿ ಬಲಿ,
ಸ್ವತಂತ್ರ ದೇಶದಲ್ಲಿ ನಿಮ್ಮ ಕೀರ್ತಿ ಹಬ್ಬಲಿ,
ಜೀವವೊಂದರ ಹೊರತು ಏನಿತ್ತು ನಿಮ್ಮ ಬಳಿ,
ಭಾವವೊಂದರ ಬೆರೆತು ಗಳಿಸಿಕೊಟ್ಟಿರಿ ಉಂಬಳಿ
೪೪."ಪ್ರೇರಣೆ"
ವೇಷ ಹೇಗಾದರೇನು ಜೀವವೊಂದೇ..
ಭಾಷೆ ಯಾವುದಾದರೇನು ಭಾವವೊಂದೇ
ಘೋಷ ಯಾವುದಾದರೇನು ಪ್ರೇರಣೆಯೊಂದೇ
ಯಶ ಹೇಗಾದರೇನು..ಕಾರಣವೊಂದೇ..
೪೫."ಸರಿ-ತಪ್ಪು"
ಗುರಿ ಸೇರಲು ಇರುವುದು ಹಲವು ದಾರಿ,
ಗರಿ ಸಾರಲು ಗೆಲುವು, ನೀವಾಗಬೇಕು ಉದಾರಿ,
ಗೋರಿ ತೋಡಿದಂತೆ, ಆದರೆ ಕುರುಡು ಗಾಂಧಾರಿ,
ಗೌರಿ ಹಾಡಿದಂತೆ ಗೆದ್ದರೆ ಅದೃಷ್ಟದ ನಾಮಧಾರಿ..!
೪೬."ಭರವಸೆ"
ಜೀವನದ ಸಾಧನೆಯ ಛಲದಿಂದ ಸವೆಸೆ..
ನೋವಿನ ಹಾದಿಯಂತೆ ಜಾರಿಸದು ಹಾವಸೆ.
ಬೇವಿನ ಮದ್ದೆಂದು ಕಷ್ಟ ನಷ್ಟಗಳ ಭಾವಿಸೆ..
ಭಾವಿಯಲ್ಲಿ ಕಾಣುವುದು ಬೆಳಕಿನ ಭರವಸೆ.
೪೭."ಸಿಂಹಾವಲೋಕನ"
ವಿಚಾರ ಮಾಡುವೆನು ನಿಮ್ಮಸಮಕ್ಷಮ,
ಆಚಾರ ನೋಡುವುದು ಯೋಗಕ್ಷೇಮ,
ಗೋಚರರಹಿತ ತಪ್ಪಾಡಿದ್ದರೆ ಬೇಡುವೆನು ಕ್ಷಮಾ,
ಪ್ರಚಾರವಿದು ಕೈಗೂಡದಿರಲಿ ನೆಮ್ಮದಿಯ ಕ್ಷಾಮ..
೪೮."ಗುಣನಡತೆ"
ಮಾತಲ್ಲಿ ತುಂಬಿರಲಿ ಮಾಧುರ್ಯ..
ಮನದಲ್ಲಿ ಕುಂದಿರಲಿ ಮಾತ್ಸರ್ಯ..
ಗುಣದಲ್ಲಿ ಹೆಚ್ಚುವುದು ಸೌಂದರ್ಯ..
ಹಣದಲ್ಲಿ ಮುಚ್ಚುವುದು ಸೌಕರ್ಯ..
೪೯."ಬೆರೆತು ಬದುಕು"
ಶಿಷ್ಟ ಜನರಿಗೆ ಮಾಡು ಹಾರೈಕೆ,
ಕಷ್ಟದಲ್ಲಿರುವವಗೆ ನೀಡು ಮುನ್ನ ಆರೈಕೆ,
ದುಷ್ಟ ಜನರೊಂದಿಗೆ ವ್ಯರ್ಥ ಓಲೈಕೆ,
ಇಷ್ಟವಾಗುವುದು ನೋಡಾ ಜಗದಿ ನಿನ್ನ ಮೇಳೈಕೆ..
೫೦."ಮಂದಹಾಸ"
ಮುಗ್ಧ ಸಜ್ಜನರ ಪ್ರೇಮದಿ ರಮಿಸು,
ಸ್ನಿಗ್ಧ ನೆಮ್ಮದಿಯ ಮುಖದಲ್ಲಿ ವಿರಮಿಸು,
ಬದ್ಧ ವೈರಿಗಳ ಹೃದಯವನೆ ಆಕ್ರಮಿಸು,
ಸಿದ್ಧ ಮುನಿಗಳ ಮನೋವೇಗದಿ ಕ್ರಮಿಸು.
೫೧."ವಸುಧೆ"
ಭೂಮಿಯೊಂದು ಜೀವಜಲ ಜನ್ಯ..
ನೇಮದಿಂದ ಸುರಿದರೆ ಪರ್ಜನ್ಯ..
ಸಮ್ಮಾನವದು ಹಸಿದ ಜೀವಿಗಳಿಗೆ ಧಾನ್ಯ...
ಬ್ರಹ್ಮನೇ ಪರಿಶ್ರಮಿಗೆ ಕೊಡುವ ಪ್ರಾಧಾನ್ಯ,
೫೨."ಸೈನಿಕರು"
ತರಿಯುವರು ಮೊಂಡ ವೈರಿಗಳ ಕತ್ತು,
ಸರಿಯವರು ಭಾರತೀಯ ಸೇನೆ ತಾಕತ್ತು,
ಉರಿಯುವರು ನಿರ್ವೀರ್ಯ ಸರ್ಕಾರ ಪದಕ ಕಿತ್ತು,
ಅರಿಮುರಿಯಲು ಯೋಧರಿಗೆ ಸರ್ದಾರ ಬೇಕಿತ್ತು.
೫೩."ಮಾತು-ವ್ಯವಹಾರ"
ವಿವೇಕ ಇದ್ದವನ ಉಪದೇಶ ಹಿತ,
ವಿವಿಧ ಯಶಸ್ಸು ನಮಗಾಗಿ ಸನ್ನಿಹಿತ,
ವಿವಾದಶೀಲಿಗಳ ಉದಾಸೀನ ವಿಹಿತ,
ವಿವರಿಸಿದರೂ ವ್ಯರ್ಥ ಉದಾಹರಣೆ ಸಹಿತ
೫೪."ಭಾವನೆ"
ದೃಷ್ಟವಿರುವುದ ಸೆರೆ ಹಿಡಿಯಲು ಲೋಚನೆ..
ಅದೃಷ್ಟದ ಬಾಗಿಲು ತೆರೆಯಲು ಆಲೋಚನೆ..
ಸ್ಪಷ್ಟಪಡಿಸಲು ಮಥಿಸಿಕೊಳ್ಳುವುದು ಯೋಚನೆ...
ಇಷ್ಟವಾಗದೆ ಮಧುರ ಭಾವಗಳ ವಿವೇಚನೆ...?
೫೫."ವಿಷಮ-ರಸ"!
ಹುಡುಗಿ ಸಿಕ್ಕರೆ ಮೊದಲು ಕೂಲ್ ಬಾರ್
ಹುಡುಕಿ ಸಿಕ್ಕದಿರೆ ಮಾಡಲು ಕಾಲ್ ಬಾರ್.!
ಮದುವೆಯಾದೊಡೆ ಜೀವನ ಸಾಂಬಾರ್
ನಡುವೆ ಕಾದೊಡೆ ನವೀನ ಸಿಮ್ ಬಾರ್...!!
೫೬."ಜನ-ನಡತೆ"
ಕೆಲವರು ಮಾಡುವರು ದಬ್ಬಾಳಿಕೆ..
ಗೆಲ್ಲುವರು ಹೊಂದಿಕೊಂಡರೆ ಬಾಳಿಕೆ..
ಪ್ರಶಸ್ತವದು ತಿದ್ದಿಕೊಳ್ಳಲು ಕೇಳಿಕೊಂಡ ತೆಗಳಿಕೆ..
ಯಶಸ್ಸಿಗೇರಿದರೆ ಗಳಿಕೆಯೊಂದು ಹೊಗಳಿಕೆ..
೫೭."ಕಷ್ಟದಲ್ಲಿ-ಇಷ್ಟ"
ತೂತನ್ನು ಹೊಂದಿರುವುದು ಬದುಕೆಂಬ ಕೊಳಲು
ಮಾತನ್ನು ಕಂಡಿರುವುದು ಒಡಕೆಂಬ ಅಳಲು
ನುಡಿಸಲದು ಸಮಚಿತ್ತದಿ ಮಧುರಸ್ವರ ಕೇಳಲು
ಬಿಡಿಸಲದು ಕ್ಷಣಕಿತ್ತದೀ ಮಂಗಳಕರ ಬಾಳಲು..
೫೮."ಸ್ವತಃ ಶುದ್ಧರಾಗಿ"
ನಮ್ಮಲ್ಲಿ ಸ್ವಚ್ಛವಿಲ್ಲದಿರೆ ತೊಳೆಯುವುದು ಕನ್ನಡಿಯನೇ.?
ಹಮ್ಮಿನ ಮುಚ್ಚಳ ತೆರೆಯದೆ ಹೇಳುವುದು ಚೆನ್ನುಡಿಯನೇ..?
ಸುಮ್ಮನೇ ಹೆಚ್ಚಾಗಿ ತಂದೆತಾಯಿಯ ಹಳಿದು ಇನ್ನೊಡೆಯನೇ..?
ಒಮ್ಮೆಯೂ ನೆಚ್ಚದಿರೆ ದೇವ ನಮ್ಮ ಬಿಟ್ಟು ಮುನ್ನಡೆಯನೇ..?
೫೯."ಬದುಕು"
ನೀವು ಕೇಳುವಿರಿ ಆರಾಮ
ನಾವು ಮಾಡುವೆವು ವಿರಾಮ
ನೋವು ಇದ್ದರೇನು ಹರಾಮ
ಕಾವುದೆಮ್ಮನು ಆ "ರಾಮ"
೬೦."ಸಾಲುಮರ"
ನೆರಳು.ಹಣ್ಣು ನೀಡುವುದು ರಸ್ತೆಯ ಸಾಲುಮರ
ಇರುಳುಗಣ್ಣಿನಲಿ ಕಡಿಯುವ ಅದ ಮಾನವ ಭ್ರಮರ
ಕರುಳು ಕೂಗದೇ ತಿಮ್ಮಕ್ಕನದು,ನರ ತಾ ವ್ಯರ್ಥ ಅಮರ
ಬೆರಳ ನೋವಿಗೆ ಕೊರಳ ಕತ್ತರಿಸುವ ಇದು ಮೋಸ ಸಮರ
Subscribe to:
Posts (Atom)