ಕಾನನ..

ಲಕ್ಷ ಲಕ್ಷ್ಯಗಳ ಮೇಳೈಸಿ | ನಳ
ನಳಿಸುವ ಕವಿತೆಯ ಸುಲಲಿತವಾಗಿ|
ಲಿಖಿಸಲು ಕವಿ ಸವಿ ಸುವ್ವಿಗಳ ಕುಲುಕಿಸಿ
ಲಕ್ಷ್ಮೀಶನ ಒಲಿಸಲಾಲಾಪಿಸಿದ..||

ಹಸಿರಿನ ಉಸಿರನು ಬಸಿಯುವ ಬಿಸಿಲಿಗೆ
ಅಳಿಯುತ್ತಿದ್ದ ಲತೆಗಳ ಉಳಿಸಲು ಇಳಿಯುತ್ತ|
ಏಳುತ್ತ ಬೀಳುತ್ತ ಹಳ್ಳಕ್ಕೆ ಅಳುಕುತ್ತ
ಆಳದ ಸುಳಿಯ ತಿಳಿಯುತ್ತಿತ್ತು ಜಲವು||

ನವಿಲಿನ ಮನಕೆ ರೆಕ್ಕೆಯ ಜನುಮ
ಕಾನನದಿ ತಾನನ ತಕದಿಮಿ ಕಿಟದಿನ|
ಕೋವಿದ ನವಿಲಿನ ನರ್ತನ ಕೀರ್ತನ
ಗಿಳಿಗಳ ಹಕ್ಕಿಗಳ ಚಿಲಿಪಿಲಿ ಸವಿ ಉಲಿ||

ಹುಲಿಗಳ ಬಾಳಲ್ಲಿ ಬೆಳಕಿದೆ ಕೊಳಕಿಲ್ಲ
ಬಿಲ್ಲು ಗುಲ್ಲು ಗಲ್ಲು ಕೊಲ್ಲು ಇಲ್ಲವೇ ಇಲ್ಲ|
ಲತೆಗಳ ತರುಗಳ ಜೀವಾಳ ಬೇವು ಬೆಲ್ಲ
ಒಳಗಿನ ಬೆಳಕಲ್ಲಿ ಇರುಳಿನ ಅಳುಕಿಲ್ಲ||

ಅಳಿಲಿನ ಅಳಲಿಲ್ಲಿ ಕೇಳಲು ಸಿಗದಲ್ಲ
ಎಲ್ಲ ಸಲ್ಲುವರು ಇಲ್ಲಿ ಅಳಿವೆಂದೂ ಇಲ್ಲ ||

ಸಲ್ಲಲಿತ ಸುಲಲಿತ ಮಾತುಗಳ ಮಲ್ಲ
ಎಲ್ಲ ಬಲ್ಲ ದನದ ಗೊಲ್ಲ ಇಲ್ಲಿಯ ಮಲ್ಲ||
ಬಾಳಲ್ಲಿ ದಯೆಯ ಬೆಲೆ ತಿಳಿಯಿತಲ್ಲ||