ನದಿ-ಜಲಧಿ

ನೀರೇ ನೀರಮಣಿಯೆ?
ನೀರವತೆಯ ಸಾಗರ ಸರಣಿಯೇ..?

ದಾಹ ನೀಗಲು ಕುಡಿಯೆ ಅದು ಬರಿಯ ಉಪ್ಪೇ..
ಮೋಹವಿಲ್ಲದೆ ತಡಿಯ ಅರಿಯದೆ ಸರಿಯ ಮುಪ್ಪೇ...
ಆಳ ನೋಡದೆ ತೇಲಿಹೋಗುವ ಭೀತಿ ಕಪ್ಪೇ..
ಗಾಳ ಹೂಡದೆ ಬಲಿಗೆ ನೀಗುವ ನೀತಿ ಒಪ್ಪೇ..

ನೀಮಮತೆಯ ಸಮುದ್ರದ ಸೆರಗಾಗಬೇಡ..
ಸುಮಲತೆಯ ಚೆಲ್ಲುವ ಮುಂಗುರುಳ ಸ್ವರವಾಗು..
ಪುಟ್ಟ ಹೂಗಿಡಗಳ ಪಾಲಿನ ನದಿಯಾಗು
ಸುಟ್ಟ ನನ್ನೆದೆಗೆ ಹಾಲಿನ ಹದಿಯಾಗು

ಬಿಳುಚಿದ ದುಂಡು ಸಾಗರಕಿಂತ
ಬಳುಕಿದ ಸಣ್ಣ ನಡುವಿನ ನದಿ ಚಂದ
ಸಮುದ್ರವದು ಚೋದನೀಯ ಉದಯಾಸ್ತಕೇ
ಸಮೃದ್ಧವಿದು ಚೇತನಕೆ ಆಪಾದಮಸ್ತಕೇ

ಜಲ ನೀನು ಬೆಳೆಯುತಿಹ ನೀರಲತೆ...
ಜಲಧಿ ನೀ ಬಿಳಿಚುತಿಹ ನೀರವತೆ....
ತೊರೆ ಬೆಳೆದು ಕುಡಿನೋಟದಾ ತರುಣಿಯು...
ತೊರೆದೆಳೆದು ಸುಡುಬಿಂಬದಾ ತರಣಿಯು...

ಹಾಡಾಗಿ ಹರಿಯುತಿರೆ ಜೀವಜಲ
ಮಲಯ ಮಾರುತ ಸೋಲದೇ..?
ನೋಡಾನೀ ಸಿರಿಯತೆರೆ ಸಿಹಿಯದೆಲ್ಲ
 ಮೇಘ ಮಲ್ಹಾರವಾಗದೇ..?